11/08/2025
မိန်းမကိုယ် မှိုစွဲခြင်းရောဂါ
ဒီတခေါက် ပြောပြပေးမယ့် အကြောင်းအရာလေးကတော့ မိန်းမကိုယ်မှိုစွဲခြင်းရောဂါ (Vaginal Candidiasis) အကြောင်းပဲ ဖြစ်ပါတယ်။ အမျိုးသမီးတွေရဲ့မိန်းမကိုယ်မှာ သဘာဝအားဖြင့် မှိုနဲ့ ဘက်တီးရီးယားတို့ လိုက်လျောညီထွေ ရှိနေတတ်ကြပါတယ်။ ဒါပေမယ့် ဒီဘက်တီးရီးယားတွေ ပျက်စီးသွားတဲ့အချိန်မှာ မှိုစွဲတာကို မကာကွယ်ပေးနိုင်တော့တဲ့အတွက်ကြောင့် မိန်းမကိုယ် မှိုစွဲရောဂါ ဖြစ်ရခြင်းပဲ ဖြစ်ပါတယ်။
မိန်းမကိုယ်မှိုစွဲခြင်းဟာ အမျိုးသမီးအများစုမှာ တစ်သက်တာအတွင်း တစ်ကြိမ်တစ်ခါတော့ ဖြစ်ပေါ်တတ်ပါတယ်။ တချို့အမျိုးသမီးတွေမှာတော့ ၂ ကြိမ်ထက်ပိုပြီး ခံစားရတတ်ပါတယ်။ မိန်းမကိုယ်မှိုစွဲခြင်းဟာ လိင်ဆက်ဆံမှုရှိတဲ့ အမျိုးသမီးတွေမှာတင်မကဘဲ လိင်မဆက်ဆံဖူးတဲ့ အမျိုးသမီးတွေမှာပါ ဖြစ်နိုင်တဲ့အတွက် လိင်မှတဆင့်ကူးစက်သောရောဂါလို့ တထစ်ချမယူဆနိုင်ပါဘူး။ ဒါပေမယ့် ပထမဆုံးအကြိမ် လိင်ဆက်ဆံခြင်းမှတဆင့်ကူးစက်နိုင်ခြေကလည်း ရှိနေပါသေးတယ်။ ဒါ့အပြင် ပါးစပ်နဲ့လိင်ဆက်ဆံခြင်း (Oral s*x) လိုမျိုး အခြေအနေတွေကတဆင့်လည်း ကူးစက်နိုင်ပါတယ်။
မိန်းမကိုယ် မှိုစွဲခြင်းကြောင့် ဖြစ်နိုင်တဲ့ ရောဂါလက္ခဏာတွေကတော့
- မိန်းမကိုယ် အလွန်အမင်း ယားယံပြီး နေရခက်ခဲခြင်း
- လိင်ဆက်ဆံနေစဥ် (သို့မဟုတ်) ဆီးသွားသောအချိန်များတွင် ပူစပ်ပူလောင် ခံစားရခြင်း
- မိန်းမကိုယ်အပြင်ဝမှာ နီရဲပြီး ရောင်ရမ်းနေခြင်း
- မိန်းမကိုယ် နာကျင်ခြင်း
- မိန်းမကိုယ်တွင် အစက်အပြောက်များထွက်ခြင်း
- ဒိန်ခဲကဲ့သို့ အနံ့မရှိသော အဖြူရောင်အနှစ်များဆင်းခြင်း အစရှိသောလက္ခဏာတွေ ခံစားရနိုင်ပါတယ်။
ထိုလက္ခဏာတွေအပြင် မိန်းမကိုယ် အလွန်အမင်း နီရဲရောင်ရမ်းခြင်း၊ မိန်းမကိုယ်ကွဲအက်ပြီး အနာများဖြစ်ခြင်းအစရှိတဲ့ ပြင်းထန်သောရောဂါလက္ခဏာများကို
- ကိုယ်ဝန်ဆောင်မိခင်တွေ
- ဆီးချိုရောဂါရှိတဲ့အမျိုးသမီးတွေ
- HIV ရောဂါ (သို့မဟုတ်) အချို့သောဆေးဝါးတွေကြောင့် ကိုယ်ခံအားစနစ် အားနည်းနေချိန်တွေမှာ ကြုံတွေ့ရတတ်ပါတယ်။
မိန်းမကိုယ်မှိုစွဲခြင်းရောဂါကို ကာကွယ်ဖို့အတွက်
- အတွင်းခံနဲ့ ဘောင်းဘီကျပ်ကျပ်များ အမြဲဝတ်ခြင်းမပြုလုပ်ပါနှင့်။
- မိန်းမကိုယ် သန့်စင်ဆေးရည်ဖြင့် နေ့စဉ်ဆေးကြောခြင်းကိုရှောင်ပါ။
- ရေစို၊ ချွေးစိုနေသောအဝတ်အစားများကို အချိန်အကြာကြီး ဝတ်ခြင်းကိုရှောင်ပါ။
- အနံ့ပါသော၊ အနံ့ပြင်းသောဆပ်ပြာများဖြင့် မိန်းမကိုယ်ဆေးကြောခြင်းကိုရှောင်ပါ။
- မိမိသဘောဖြင့် မလိုအပ်ဘဲ ပိုးသတ်ဆေးများသောက်ခြင်းကိုရှောင်ပါ။
- ရေနွေးပူပူဖြင့် မိန်းမကိုယ်အား ဆေးကြောသန့်စင်ခြင်းကိုရှောင်ပါ။
မိန်းမကိုယ်မှိုစွဲခြင်းပျောက်ကင်းဖို့အတွက် မှိုသတ်ဆေးလိမ်းခြင်း၊ သောက်ခြင်းတွေ ပြုလုပ်နိုင်ပါတယ်။ မိန်းမကိုယ်မှိုစွဲခြင်းခံစားနေရပြီဆိုရင်တော့ ဆရာဝန်နဲ့စနစ်တကျ တိုင်ပင်ပြီး မှိုသတ်ဆေးကို ဆရာဝန် ညွှန်ကြားတဲ့အတိုင်း သောက်သုံးဖို့/ လိမ်းပေးဖို့ လိုအပ်ပါတယ်။
မိန်းမကိုယ် မှိုစွဲခြင်းရောဂါနဲ့ ပတ်သက်ပြီး ဒီထက်ပိုပြီး သိချင်သေးတာရှိရင် ဒါမှမဟုတ် ကိုယ်ဝန်ဆောင်ကျန်းမာရေးနဲ့ အခြားသော အထွေထွေ ကျန်းမာရေးကိစ္စတွေကို ဆွေးနွေး တိုင်ပင်ချင်တယ်ဆိုရင်တော့ Equal Health ရဲ့ ဖုန်းနံပါတ် ဖြစ်တဲ့
Phone - 0620703913
Viber – +66620703913
Line – +66620703913
တို့ကို တနင်္လာနေ့ကနေ ကြာသပတေးနေ့အတွင်း မနက် ၉ နာရီမှ ညနေ ၅ နာရီအထိ ဖုန်းခေါ်ပြီး ဒါမှမဟုတ် စာပို့ဆက်သွယ်ပြီး တာဝန်ကျ ဆရာဝန်နဲ့ "အခမဲ့" တိုင်ပင်ဆွေးနွေးနိုင်ပါတယ်။ ကိုယ်ဝန်ဆောင်ကျန်းမာရေးစောင့်ရှောက်မှုနဲ့ အခြားသောကျန်းမာရေးအတွက် ဆွေးနွေးတိုင်ပင်မှုတွေက "အခမဲ့" ဖြစ်တဲ့အတွက် စာပို့ဖို့ ဖုန်းခေါ်ဖို့ တွန့်ဆုတ်မနေဘဲ အခုပဲ ဆက်သွယ်လိုက်ပါ။
စိတ်ကျန်းမာရေးနဲ့ ပတ်သက်ပြီး တိုင်ပင်ဆွေးနွေးချင်တယ်ဆိုရင်တော့ ဒီအောက်မှာ ပေးထားတဲ့ link လေးထဲကို ဝင်ရောက်ပြီး ကြိုတင်စာရင်းသွင်းပြီး တိုင်ပင်ဆွေးနွေးနိုင်ပါတယ်။
👉 http://equalhealth.mymedicine.com.mm
ကြိုတင်စာရင်းသွင်းတာနဲ့ ပတ်သက်ပြီး အခက်အခဲရှိရင် ဒီအောက်မှာ ပေးထားတဲ့ link ထဲကို ဝင်ရောက်ကြည့်ရှုနိုင်ပါတယ်။
https://tinyurl.com/EH-MHBookingSteps
#အကြင်နာတွဲလက်အီကွဲဟတ်
