31/08/2025
ကျန်းမာရေးနဲ့ လိမ်လည်လှည့်ဖျားမှုများ (ကျားဖျ-န့် နှင့် ဆေ-:ဝါးအတုများ)
ကျွန်တော်တို့ပတ်ဝန်းက တီဗီ၊ အင်တာနက် ( 𝑭𝒂𝒄𝒆𝒃𝒐𝒐𝒌, 𝒀𝒐𝒖𝒕𝒖𝒃𝒆, 𝑻𝒊𝒕𝒕𝒐𝒌 စသဖြင့်) ကြော်ငြာတွေကနေ လူတစ်ဦးမဟုတ်တစ်ဦး မိနစ်တိုင်းမှာ ကျန်းမာရေး လိမ်လည်လှည့်ဖျားမှုတွေ ခံနေရပါတယ်။ အချိန်ခဏယူပြီး ကျွန်တော်နဲ့အတူလေ့လာပြီး ကျန်းမာရေး လိမ်လည်လှည့်ဖြားမှု တွေကိုသိရှိပြီး သတိထားဆင်ခြင်ကြပါစို့။
ကျန်းမာရေး လိမ်လည်လှည့်ဖြားမှု ဆိုတာဘာလဲ?
လိမ်လည်လှည့်ဖြားပြီး ကျန်းမာရေးပစ္စည်းတွေ အတုရောင်းချကာ လိမ်ညာနေတာမျိုးတွေ ရှိသလို ဆေးခန်းအတု၊ ဆေးရုံအတုတွေကနေ ဆရာဝန်အတု ဆေးမှတ်တမ်းအတု တွေနဲ့ လိမ်ညာနေတာမျိုးတွေလဲ ရှိပါတယ်။ ကျန်းမာရေး လိမ်လည်လှည့်ဖြားမှုတွေရဲ့ လမ်းကြောင်းတွေကတော့ ခန္ဓာကိုယ်အလေးချိန် လျှော့ချခြင်း၊ လိင်ပိုင်းဆိုင်ရာ လုပ်ဆောင်မှု၊ ကိုက်ခဲနာကျင်မှု၊ မှတ်ဉာဏ်နှင့် အခြားဝေဒနာတွေကို ကူညီဖြေရှင်းပေးနိုင်မယ်လို့ ဦးတည်ရာကနေ လိမ်လည်လှည့်ဖြားပြီး အလျင်စလို တိုက်တွန်း လုပ်ဆောင်ခိုင်းလေ့ ရှိပါတယ်။ ကင်ဆာ၊ HIV နဲ့ အယ်လ်ဇိုင်းမားကဲ့သို ရောဂါပင်လျှင် ကူညီပေးနိုင်မယ့်လို့ ဂတိပြုလေ့ရှိပါတယ်။ တစနဲ့တစ ကျွန်တော်တို့မိသားစု၊ သူငယ်ချင်းမိတ်ဆွေများကိုပင်လျှင် ခန့်အပ်မြူစွယ်ပြီး လိမ်လည်တဲ့ ဆေးကုသမှု၊ ကုန်ပစ္စည်းအတုတွေကို ရောင်းချကာ လိမ်လည်လှည့်ဖြား မျှော်လင့်ချက်ပေးကာ ပြန့်နှံ့စေပါတယ်။
ကျန်းမာရေး လိမ်လည်လှည့်ဖြားမှုတွေကြောင့် ဘာတွေဆက်ဖြစ်မလဲ?
ကျန်းမာရေး လိမ်လည်လှည့်ဖြားမှုတွေကို ယုံလွန်ပြီး အသုံးမဝင် အဆင်မပြေတဲ့ ဆေးများ၊ ဖြည့်စွက်စာများ၊ ကိရိယာပစ္စည်းများနှင့် ကုသမှုများကြောင့် ငွေကုန်ကြေးကျများကာ ကျန်းမာရေး ပိုထိခိုက်စေပါတယ်။ မတိကျမသေချာတဲ့ ကျန်းမာရေးထုတ်ကုန်၊ကုသမှုတွေကြောင့် လုံလောက်တဲ့ကုသမှု မရရှိတဲ့အပြင် အရေးကြီးတဲ့ ရောဂါကြီးတွေကို ကနဦးအဆင့်မှာပင် သတိလက်လွတ်ဖြစ်ကာ ရောဂါပြင်းထန်စေပါတယ်။ တချို့သော ထုတ်ကုန်တွေ၊ ကုသမှုတွေက သင့်ကျန်းမာရေးအတွက် အထောက်အကူပြုနေသော ကုသမှု၊ ဆေးဝါးများကိုပင် အနှောင့်အယှက်ဖြစ်စေကာ အသက်ဆုံးရှုံးသည်အထိ ဖြစ်နိုင်ပါတယ်။
ကျန်းမာရေး လိမ်လည်လှည့်ဖြားမှုတွေကနေ ကင်းလွတ်အောင် ဘာတွေလုပ်သင့်သလဲ?
များပြားလှတဲ့ မသက်ဆိုင်မစီလျှော်တဲ့ ရောဂါတွေကို ကုသပျောက်ကင်းပါကြောင်း အာမခံချက်တွေ ပေးနေပြီဆိုလျှင် အထူးသတိထား ဂရုပြုရှောင်ရှားဖို့လိုပါမယ်။ ပြင်းထန်ပြီး ကုသရခက်သော ရောဂါများကို ကုမ္ပဏီတွေအနေနဲ့ လူပုဂ္ဂိုလ်အနေနဲ့ ကုသပေးနိုင်သည်ဟု အာမခံပေးနေသည်ပင်ဆိုလျှင် အရာရာသံသယနဲ့ စဉ်းစားစဉ်ခြင်ပြီး သတိပြုနေထိုင်သင့်ပါတယ်။
ဘယ်လိုလူတွေ ကျန်းမာရေး လိမ်လည်လှည့်ဖြားခြင်းတွေ ခံရနိုင်ချေပိုများလဲ?
● ကျန်းမာရေး အသိပညာနည်းသူများ
● ဝေးလံခေါင်းဖြာနေရာ ဒေသတွင်နေထိုင်သူများ
● စီးပွားရေးအဆင်မပြေ၍ ကျန်းမာရေးတွက် ငွေကြေးခက်ခဲသူများ
● သက်ကြီးရွယ်အိုများ
● လွဲမှားသော လိုရဆွဲပြောသော ကျန်းမာရေးအသိပညာပေး အစီအစဉ်များကို ကြည့်ရှုမိခြင်း
● ကျန်းမာရေးတွက် စိုးရိမ်ပူပန်မှုလွန်ကဲခြင်း
● ပွင့်ပွင့်လင်းလင်း တိုင်ပင်ပြောဆိုကုသရန် ခက်ခဲသောရောဂါများ ခံစားနေရခြင်း၊ ကုသရန်ရှက်ခြင်း (အမျိုးသားရောဂါ၊ အမျိုးသမီးရောဂါ၊ လိပ်ခေါင်းနှင့် စိတ်ကျန်းမာရေး)
● မူးယစ်ဆေးဝါး သုံးစွဲသူများဟာ လိမ်လည်လှည့်ဖြားခြင်းတွေ ခံရနိုင်ချေပိုများပါတယ်။
ကျန်းမာရေး လိမ်လည်လှည့်ဖြားမှုတွေ ကင်းဝေးဖို့နည်းလမ်း(၅)သွယ်
● မိမိကိုယ်တိုင်လေ့လာပါ- အွန်းလိုင် ကုသမှုတွေ၊ ဆေးဝါးတွေကို အခြားသူပြောစကားထက် မိမိကိုယ်တိုင် ရှာဖွေလေ့လာပါ၊ ဆန်းစစ်ပါ။
● ကျန်းမာပညာရှင်များနှင့် ဆွေးနွေးတိုင်ပင်ပါ- ကုသမှုတွေရဲ့ ကောင်းကျိုးဆိုးကျိုးတွေနဲ့ နည်းလမ်းတွေကို ကျန်းမာရေးပညာရှင် ဆရာဝန်တွေနဲ့ သေချာဆွေးနွေးတိုင်ပင်ပါ။
● တိကျသေချာတဲ့ ထောက်ခံမှုမရှိတဲ့ ဆေးဝါး၊ ကုသမှုတွေဟာ အန္တရာယ်ရှိတယ်ဆိုတာကို သိရှိနားလည် လက်ခံပေးပါ- အချို့ဆေးဝါးတွေကုသမှုတွေဆို မှန်ကုန်တဲ့ကုသမှု ဆေးဝါးများအပေါ် သက်ရောက်မှုအန္တရာယ်တွေ ဖြစ်ပေါ်စေနိုင်ပြီး ကောင်းမွန်တဲ့နေထိုင်မှု အပြုအမှုတွေကိုပါ နှောင့်နှေးစေပါတယ်။
● သဘာဝ ထုတ်ကုန်ဆိုတိုင်း ကောင်းမွန်စိတ်ချရတယ် ဆိုတာမျိုး မဟုတ်ဘူးဆိုတာ လက်ခံ သိရှိထားပေးပါ။
● ကြော်ငြာတယ်ဆိုတိုင်း ကျန်းမာရေး ထောက်ခံချက်ရှိပြီး၊ စိတ်ချရတယ်ဆိုတာမျိုးကလဲ မမှန်ဘူးဆိုတာ သိရှိထားပါ။
နောက်ဆုံးအနေနဲ့ အကြံပြုလိုတာကတော့ ကျန်းမာရေး လိမ်လည်လှည့်ဖြားမှုတွေ အတုအစစ်ခွဲခြားဖို့ ဝန်မလေးပါနဲ့ မှားပြီး ကိုယ်တိုင်ခံရရင်လဲ မရှက်ပဲ အခြားသူတွေကို မျှဝေပေးဖို့ အသိပေးဖို့ တိုက်တွန်းလိုပါတယ်။ ပတ်ဝန်းကျင်မှာ ကျန်းမာရေး လိမ်လည်လှည့်ဖြားမှုတွေ အမြဲဖြစ်ပေါ်နေပြီး ကျန်းမာရေး လိမ်လည်လှည့်ဖြားမှုတွေရဲ့ သားကောင်မဖြစ်အောင် ဂရုတစိုက် စည်းစနစ်တကျ သတိပြုနေထိုင်ကြပါလို့ အကြံပြုရင်း စိတ်နှလုံး ကျန်းမာရွှင်လန်းကြပါစေ။
𝑫𝒓. 𝑻𝒉𝒖𝒓𝒂
#ကျန်းမာရေးလိမ်လည်လှည့်ဖြားမှု
#ဒေါက်တာသူရ
