08/04/2025
زميلتنا الدكتورة ريم عبد الملك، اخصائية في infectiologie تكتب:
❌الفايسبوك راهو سيف ذو حدّين. كي يتستعمل كيما يلزم، ينجم يكون وسيلة باش نوصّلوا المعلومة، نقربوا من الناس، ونوعّيوهم. أما كي يطيح في يد ناس غالطة، يولي خطر كبير، خاطر تنجم تنتشر فيه برشا معلومات غالطة.
⚠️تلقى برشا ناس، حتى بعض الأطباء، يحسبوا رواحهم أذكى وأشرف وأعلم من الباحثين والخبراء. أما راو قراية الطب ما تعنيش إلّي الواحد يفهم في كلّ الأمراض! برشا منهم تحت تأثير نظريات المؤامرة، والدجل، وموجة "الانتي فاكس".
قاعدين تدور برشا خرافات، خلينا نوضّحوا ونردّوا بالعقل:
1- فيروس HPV يتنقل كان عبر العلاقات الجنسية: غالط! الفيروس هذا عاري nu، يعيش في كل بلاصة، على الثياب، الجلد، الأسطح... يتنقل باللّمس، من الجلد للجلد، من الجلد للمخاطية، ولا حتى من شي نستعملوه. الأم تنجم تنقلو لولدها الصغير وهو bébé حتى وقت تبدلو les couches! زادة، ينجم يتعدى بين العائلة، بين الاصحاب، في الخدمة، في السينما، في قاعة الرياضة، حتى في صالون التجميل. وحتى الناس اللي يتعاملوا مع الثلالات verrues بلا كمامة، ينجموا يلقطوه بالتنفس! اي نعم بالتنفس!
2- البنات العذراوات ما يتعداوش بالفيروس: غالط! فما بنات صغار ما زالوا عذراوات وتعدّاو وتطوّر عندهم س..رط..ان عنق الرحم! وزيد، وقت باش تعرس، منين نعرفو راجلها ما كانش حامل للفيروس قبل؟
3- كافي إننا نعملوا تقصي: لا، هذا ما يكفيش! الس..رط..ان هذا يضرب النساء بين 30 و45 سنة، والبرشا منهم يجيو في مراحل متأخرة وتحتاج شيميو، راديو، وعمليات. يخلّي وراه عائلات مكسورة، صغار يتامى، ومعاناة كبيرة.
4- ال HPV فيروس بسيط و ما يخوفشي: موش ديما! خاطر ينجم يعطي ثلالات ونموات غير طبيعية على الجلد والمخاطية. من 230 نوع، فما أنواع تسبب س..رط..انات، وخاصة النوع 16 و18، وهما اللي داخلين في التلقيح.
5- يعمل كان س..رط..ان عنق الرحم: غالط! ينجم يعطي س..رط..ان في اللسان، اللوز، الحلق، البلعوم، الرئة، الثدي، المهبل، الفرج، القضيب، المثانة...
6- التلقيح يسبب العقم: غالط! بالعكس، ال HPV ينجم هو يكون السبب في العقم عند الرجال!
7- المناعة تنجم تسيطر عليه؟ موش ديما! الفيروس هذا ينجم يقعد في الجسم ويعمل بالتالي إصابات جديدة! كي يقعد مدة، يسبب في التهابات، ومن بعد تغييرات في الخلايا، ومن بعد يولي س..رط..ان، وكل هذا يصير في صمت، بلا أوجاع، حتى يكتشفوه، وتبدأ الرحلة للعذاب، للمريض ولعائلتو، لصغارو، لوالديه...
8- التلقيح موش فعّال، خطير وجديد؟ غالط، غالط، وغالط! التلقيح هذا قصتو بدات من الثمانينات، وصار عليه تجارب منظمة دامت 20 سنة. وهو فعّال، يتحمّلوه الناس مليح، واستعملوه من 19 سنة لتوّة!
9- التلقيح خطير؟ غالط! التلقيح كيفو كيف أي دواء، عندو منافع، وتنجم تصير أعراض جانبية خفيفة، لكن مقبولة مقارنة بالمنافع اللي يعطيها. فما ناس مختصة تراقب الآثار الجانبية وقت يبدأ يستعملوه في الحياة اليومية. ومن 19 سنة لتوّة، ما فماش حتى إنذار على حاجة خطيرة تستوجب إيقافو! بالعكس، نجح في تقليل حالات الس..رط..ان في البلدان اللي استعملتو!
10- إحنا بلاد مسلمة، موش كيف الغرب: الفيروس ما يعرف لا دين لا جنسية! و للعلم فما برشا دول عربية وإسلامية حاطين التلقيح في برامجهم!
بدينا نلقّحوا البنات، أما حتى الأولاد يلزمهم ياخذوه في المستقبل. باش نحميوا رواحنا من الس..رط..انات والثلالات اللي تعمل مشاكل نفسية واجتماعية كبيرة!
⚠️أنا نستنى باش يتوفر التلقيح ولا يدخل للأولاد باش نلقّح ولدي! وينجم الواحد يعمل "رطراپاج" حتى لعمر 26. كيما صارت مع حصبة الريح كان تتذكروا (rubéole)، بدينا بالبنات، وبعد دخلوا الأولاد زادة.
لقّحوا لبناتكم، راهو خير وسيلة للحماية!
