https://www.facebook.com/106146675706074/

Espace LIBRY By Babou, Cité belvédère, Bizerte, Bizerte (2025)

14/09/2023

نهاركم زين ✌️❤️
عنوان post ليوم : لوقتاش بش نقعدو مصدقين الغول إلي في مخاخنا ؟؟

نحكي ب "نحن" خاطر أنا معاكم و كيفكم ...
شنوة معناها كي نسألك شنوة حوالك و شعامل و إلا شعاملة تحكيلي على الاحداث إلي دايرة بيك او الاشخاص المقربين ليك....
انا و انت وقت نكلمو بعضنا في تاليفو او نتقابلو وجها لوجه، شبينا مانحكيوش على رواحنا، شبينا نجبدو حكايات أشخاص اخرى، شبينا نحكيو على أحوال صحابنا و عائلتنا...اي و احوالنا احنا، وين محلهم من الاعراب؟؟

قداش بش نقعدو هاربين من الغول "فاش نحسو و فاش نخمم""
و علاش هاربين منهم؟؟؟
شفيهم يخوف؟؟

علاش كي نقلك شنوة حوالك، تحكيلي على أمور الخدمة ؟! ياخي انت الخدمة !؟
و علاش كي نقلك شنية لومور تحكي على عايلتك شعامين؟ ياخي انت عايلتك؟؟؟

نحب نقول إلي لكلنا نطيحو فيه الفخ هذا. اي نعم لكلنا، بعد ما نجاوبو ب : الحمدلله لباس، نتعاداو طول في مسرب بعيد على كل ماجة تمسنا، بعيد على مخي شفيه، فاش نخمم، شنوة نحب نعمل، مناش حايرة، فاش نخمم، شنوة مقلقني ... ، باش مشغولة.. الخ الخ .

ليوم نحب نقول قداش بش نقعدو خايفين منو الغول إلي في مخاخنا؟؟؟
اي غول، خاطر أفكارنا ليست الحقيقة على هذه الارض، هي مفاهيمنا و قناعاتنا و وجهات أفكارنا ....
يعني خيال او وهم ....

غول شنوة بش يقولو عليا العباد
غول شكون حقق نتائج أكثر
غول شكون خير من الاخر
غول المقارنة
غول شكون احسن
غول، غول، غول.....

لوقتاش بش نقعدو مصدقينو الغول هذا!!!!.

03/09/2023

عسلامة صوحابي 😊 post ليوم spécial شوية، بعنوان ⚠️ رحلة الحياة، لعبة الحياة

من قوة الرحمة الإلهية 🙏

وقت يكون عندك موضوع شاغلك بالك، أو قصة قديمة مازالت معششة في مخك، أو ندم أو حسرة أو ألم في القلب.
تكون انت خرجت منها الحكاية، وأصبحت قديمة نوعا ما. يعني ليها مدة، ممكن شهور و ممكن أعوام.
و لكن المشاعر مازالت في قلبك.
⬆️ هذا كان الاطار،
تو بش نحكيلكم على🥳🥳 طريقة التصرف في مثل هذه الاوضاع

وقت يخلط الإنسان واعي بهذا الشعور المؤلم و يكون غير قادر على التجاوز.... كيما نقولو "الرجوع لربي"
يضرب خماسو في سداسو و يعرف إلي " الله على كل شيء قدير"

يتوجه الإنسان" بإرادة ووعي " و يسلم الأمر للقوى العليا، و يطلب من ربي بش يخفف عليه و إلا يعوضو ما خير .... و يكون صادق في نيتو... و يكمل يعيش على روحو عادي
المنهج هذا أو الطريقة تتطلب بعض الشروط، كيما
1.الإيمان بالله
2.الايمان بأن الله كل شيء قدير
3.و و الإيمان بأن الله أرحم الأرحمين

و في رحلة الحياة ( يعني في الايامات العادية) يجي نهار وتصير المعجزة.
فيعيش الانسان (موقف او تجربة) تنسيه في الألم القديم بصفة يجز العقل على تصورها.

💫ما تفيق بروحك كان الموضوع إلي كان مقلق مشى على روحو، لا وجود له لا في مخك و لا في قلبك 😜
اش صار ؟؟؟
إلي صار هو: وقت جاء التوقيت الإلهي باش الموضوع يختفي من حياتك، تتجلى و تتفعل إرادة ربي و تختفي و تزال كل المشاعر السيئة ( سواء كانت تعلق او ألم او فقدان الخ ) إلي إنت طلبت ربي يعاونك عليها ....
سبحان الله و بحمده.

مراحل التجربة تتلخص في🔽
الإدراك بالمشكل/الوضع/المشاعر
نية صادقة في طلب الاستعانة بالله
تسليم الموضوع لله والعيش في الحياة عادي
وتقبل وجود هذا الألم الداخلي
*( نتقبله في حياتي و أنا واعي إلي هو موجود في حياتي و لكن نفوضو لربي عز و جل، لأنني غير قادر على حل هذا المشكل)
إلى أن تتغير الاشياء في التوقيت الإلهي الأنسب لنا ⚠️
*الأنسب لنا وفق علم ربي، مش علمنا أحنا و تفكيرنا أحنا...
....رحلة الحياة، لعبة الحياة

"و هو على كل شيء قدير"
"و يشف صدور قوم مؤمنين"

✌️❤️ اتشارك معكم أفكاري من تجربتي في الحياة ...

24/08/2023

نهاركم زين 😜 عنوان ال post ⚠️ وهم الأهداف و نسق الحياة السريع

وهم الاهداف،
الفكرة السائدة في المجتمع، شنوما أهدافك و قداش حققت منهم ...
و فكرة "مقارنة الاهداف" و شكون الهدف متاعو اكبر و أقوى... و حققت الهدف متاعك في قداش وقت.
منافسة لا نهاية لها، مع روحك، مع الاشخاص من حولك و مع الحياة.

صحيح مش من المعقول نعيشو حياة عشوائية من دون تخطيط، من دون أهداف. و لكن حبيت نلفت الانتباه لمجرى الحياة، للتدفق الحياة، لمدى توازن الشخص على هذه الحياة و لمدى اليسر او العسر الذي يعيشه الشخص و الإنسان على هذه الحياة....
حبيت نقول جملة في الفكرة متاعي ملخر: في كل مرة تكون الحياة غير ميسرة، تكون فيها تعطيلات، يكون فيها مشاكل .... لازم نفهمو موضوع مهم برشا و نطرحو الأسئلة على انفسنا: وينو المشكل ؟؟؟
شنوة أنجم نغير ما بنفسي من أفكار، ردات فعل، معتقدات، قرارات، عادات .... و أكثر حتى اكون في حياة " ميسرة"

الفكرة كونو، و بالنسبة ليا انا، لازم يكون فما تناغم بيننا و بينا العالم من حولنا، قبل ما نحكيو على أهداف و على تحقيق أهداف...
و من خلال التركيز على1. علاقتنا بأنفسنا و 2. علاقتنا بالخالق، نخلطو للتناغم على هذه الحياة.

نتشارك معاكم شوية طرق ملي نستعملهم انا في حياتي :
الكتابة اليومية
الامتنان عبر الكتابة او في التاملات
التامل
الاكل الصحي
و برشا حاجات أخرى....
نهاركم زين أصدقائي و صديقاتي، و بالتوفيق لينا جميعا ❤️✌️

07/08/2023

هذا ال post ⚠️ بعنوان : حكايتي مع النوم 🙃🙃

مرة أخرى نقص النوم و النوم امخر يأثر عليا.
قبل كانتش فاهمه إلي فم علاقة بيناتهم.
ندور و ناكل، و عندي une envie de manger غير عادية... فم خلل quelques part
المرة هاذي فقت بيها الفازة و هاني شادة العسل

عندي مدة منحية السكر و العجين. ممكن جمعتين ولا أكثر. و بالطبيعة فرق كبير يكون على بدني بين كي ناكل السكريات و بين كي نكون بعيدة عليهم. فرق على الطاقة متاعي، على أفكاري، على شهواتي....

وقت نحكي على نوم مخر نقصد نوم بعد 2 و 3 متع الصباح. نوم عكس الساعة البيولوجية متع البدن.

بتجربتي نلاحظ فرق كبير بين الفترة الي نكون فيها نرقد مليح، يعني بكري ( بين العشرة و الحداش) و ساعات كافية (بين 7 و 8 سوايع)، الي نسميها النوم المنظم و بين الفترة الي" لأسباب مختلفة" يكون فيها النوم متاعي ماهوش منظم.

نلاحظ الفرق على قدرتي في تمالك نفسي مثلا قدام السكر، في الفترة المنظمة، السكر/ السكريات و الحلويات ما يقدروش يغريوني جملة. مايزعزعونيش. نكون ماخذه قراري إلي أنا ماناكلهمش و مانيش بش ناكل حتى كي يبدأو قدامي فوق الطاولة. بينما في الفترة الغير منظمة ... مايكونش عندي القدرة الكافية/ العزيمة و قوة اخذ القرار هذا. نضع بسهولة. و كان كليت مرة نوحل معاه نتعدي للبعدو و إلي بعدو ... و نرجع ناكل بصفة يومية لعديد المرات في اليوم. و يرجعني القلق الي يجيني من جرتو. الحاصيلو.

نلاحظ زادة مدى تأثير نقص النوم على هدوء اعصابي في المواقف الحساسة، كيما في نقاشات مع العايلة و إلا غير... في الفترة المنظمة نكون عندي قدرة و قوة على الهدوء ة تجاهل les futilités. بينما في الفترة الغير منظمة ممكن استفز بسهولة و ندخل في نقاشات ماكنهم فائدة.

نتعداو لموضوع التركيز، و ما أدراك ما التركيز. لسنين عديدة كنت عندي خلل تركيز في فترة المراهقة متاعي و حتى يعد. و كانت مقلقتني الحكاية و لكن ماكنتش فاهمة لا المشكلة و لا سبب المشكلة.

و تو بش نتعدا لموضوع les sauts d'humeurs.
باختصار، يعني وقت نتعداو من "حالة" نكونو لباس علينا و نحسو في رواحنا عادين و ماعنا شنوة مقلقنا الي "حالة" متقلقين، ماناش مرتاحين، ماناش في صحنا و حالة " chez pas ce que j'ai " ههههه
خلل جودة النوم و اكل السكريات سبب كبيييير وراء هذا المشكل و للأسف.

الحاصيلو، حبيت نتشارك معاكم الموضوع لأنو سنوات قليلة قبل ماكنتش على علم بكل هذه المعلومات، و الآن و الحمدلله جربتهم و تعديت بيهم و حسيت و استشعرت عديد النعم وقت نحترم قانون الساعة البيولوجية و نبعد على ماكلت السكريات (إلي قبل كنت محسوب مدمنة عليهم )

و بالمناسبة ال healthy lifestyle هذا بش يكون أساسي في الرحلات او السفرات القادمة معBabou إنشاءالله .
لا لشيء و أكن حتى نكونو المجموعة لكل في طاقه و ذبذبات جميلة

هوما محلاهم الاحتفالات و surtout الصيفية 😄واللمات و اللقاءات. و لكن نحاول في حياتي اليومية تكون "الفترة المنظمة " هي إلي نعيش بيها أكثر الوقت و يكونو "الفترات إلي ماهمش منظمين" قلال و بصفة نادرة...
المواظبة هي الأداة إلي نرجعو بيها لكل ثانية نحبو نتبعوها، حتى و كان نبعدو/نغلطو ، الحل يون ديما في التصليح.

بيزو les Zamy و إلي لقاء قريب 🙃✌️

21/06/2023

نهاركم زين 😍😍😄
موضوع اليوم: التدريج او التحضير ل ...// من أكثر الأفكار الي نحبهم في الدنيا
زوز مصطلحات حبيت نقولهم مبعضهم (اختياري الشخصي بش الفكرة تخلط اوضح)

لقيت روحي نكون مرتاحة أكثر و مقتنعة أكثر و فاهمة روحي أكثر وقت نقوم بالشيء بالتدريج...
مثلا نقولو بش نغادر مكان سوى باختياري او لا. مش هذا المهم بالنسبة ليا، لا لشيء إلا كوني نأمن كونو فما وقت لكل حاجة . لكل حاجة تظهر في حياتنا و لكل حاجة تخرج من حياتنا.
الحاصيلو، إذا نكون عندي المعلومة مثلا إلي أنا بش نغادر مكان ما و ماعاش بش نرجعلو و إلا ماعاش بش ننتمي ليه، نحاول ندخل الفكرة في مخي وحدة وحدة. نبدأ نتخيل كيفاش انا بش نكون اخر مرة نقعد في المكان هذا مثلا، نستوعب إلي أنا ممكن آخر مرة بش ندور فيه المكان او بش ناكل فيه او بش نبات فيه .....
التحضير و التدريج على المستوى المشاعري شخصيا يساعدني برشا بش نتقبل الظروف إلي نتحط فيها، او نختارها ساعات.
التغيير الفجئي منحبوش، مانحبذوش الحقيقة.
و لكن في بعض الأحيان يصيرو الظروف و نتحطو لكلنا في مواقف و وضعيات ماكناش نتخيلوها. يصير.
و في المواقف هاذي نرجع لروحي و نحاول نذكر روحي إلي في الدنيا مش كل شيء يصير كيما نختارو احنا، و ممكن هاذم تحديات الحياة زادة. و إلي أحنا نتحطو في مواقف يخرجونا من منطقة الراحة متاعنا. و إلي هو امتحان ينجم يكون صغير والا كبير. و لكن ... اخيرا ولات عندي "فكرة أو معتقد او قناعة" اكتسبتها في المدة الأخيرة : كوننا كلنا في هذه الحياة خاضعين لقانون "الخير المطلق" حتى و لو كان الظاهر عكس هذا....
سبحان الله هو الأدرى و الأعلم بالسبب و النتيجة من كل حدث على هذه الأرض.

الفكرة هذي عرضتني في كتاب "" أربعون لاحمد الشقيري و سمعتها زادة من عند نهال الناصفي في برنامجها "" حرر نفسك.

و تستمر رحلة الحياة ❤️ و يستمر تطور و تغيير القناعات
و سبحان الله، الحقيقية (ممكن الوحيدة) على هذه الارض هي : التغيير.

خواطر من هذا الصباح.... بابو بكل حب❤️🙏🙏

27/05/2023

هاذم تصاور من رمضان، انا و صديقتي التحفونة، كنا ندور في المدينة و نكملو في شوية قضيات قبل شقان الفطر، تعدينا بحذا la fameuse porte هاذي بحذا نهج الزيتونة، و وقفنا بش نعملو تصاور....
عاد فما راجل وقف يتفرج فينا، هوا أجنبى، من اليابان و في يدو مصورة. قالي ميسالش نصوركم؟؟ قتلو اي....
خذالنا زوز تصاور، حكيت معاه شوية، قالي مازالو نهارين و يسافر و حكالي إلي كان في الجنوب يكتشف، يزور و يصور. .... الحاصيلو، سألني كان انجمو نقعدو باتصال، ياخي بالطبيعة و كيما العادة عطيتو اسم الانستغرام متاعي و باي باي بسلامة

مبعد إكتشفت sur Instagram إلي السيد مصور بلحق. و إلي عندو موقع فيه برشا تصاور، يخدم برشا B&W و بالفعل قعد كل مدة يبعثلي مساج و يقلي على شعندو جديد و هو في أنا بلاد هههه الخ الخ

الموقف هاذا، و الا القصة هذي نحكي فيها ليوم علاش؟؟ 😁😁
الحقيقة بالنسبة ليا، التعرف على عباد جدد او التعرف على غرباء , حاجة enrichissante و ديما نعملها.
و في برشا وضعيات يبدى الي معايا يقلي منين تعرفو و إلا منين تعرفها بش تحكي معاه!!!

انا نحس روحي عادي علخر كي نحكي و ندخل في نقاشات مع عباد منعرفهمش. بالعكس غادي وين نشيخ ههههه
و نزيدكم، حتي كي نسافر، ندخل en contact فيسع فيسع مع العباد، في train, في ال hostel, في السوق .....

وينو المشكل كي تاخو و تعطي كلمة مع خلق ربي، لازم ديما نتقعدو نعرفو كان الاشخاص الي في الدائرة متاعنا؟؟
لازم نسكرو على رواحنا ؟
و كي يطلع فما تبادل أفكار نافع، ليك و إلا للطرف الاخر... علاش نحرمو رواحنا. علاش نعملو في نموسة لرواحنا و نتعاملو مع إلي مانعرفوهش كشخص يخوف؟؟
بلحق الاخر يخوف؟؟ و الا أفكارنا و إلي لقيناه من تجاربناو تجارب السابقين هوما إلي يخليونا نخافو 😜.

صحيح القاعدة الكونية 😁😁 عينك ميزانك، مش بش ترمي روحك علي يجي ههه و إلا علي يمشي لووول

ال" عملية هذي" ال هي "نحكي و نتعرف على الغرباء" في جرتها تعرفت على برشا أشخاص محلاهم و عشت قصص يعلم كان ربي قداش استنفع منهم..ّ و الحمدلله في أكثر الأوقات نطيح كان باولاد الحلال كيما نقولو

اي عاد، شقولكم في التصاور 😁😁😄❤️
المصور كان اسمو : Masahiko

بابو بكل حب أصدقائي و صديقاتي🙏
😜🤍🤍

23/05/2023

⚠️⚠️ العنوان: نظرتي للأشياء تبدلت.
نهاركم زين صوحابي 🙏😍😍

أنا بيدي... نفس العبد، نفش الشخص، اما الحاجات إلي كنت نعملهم بش نتفرهد ولاو ماعاش مغريين بالنسبة ليا.
مفهومي للاشياء تغير، مفهومي للترفيه تبدل.

يعني مثلا، كنت برشا مرات نحب نمشي ناكل حوت مشوي في ال vieux port . توا مازالت نحب ناكل الحوت المشوي، و لكن نحبذ في عديد المرات ناكلو في الدار،
منعرفش كيفاش نفسرها، اما قبل كان نمط العيش متاعي فيه برشا خروج.
البرشا متاعي ماهاش référence. بالطبيعة كل شيء نسبي، و لكن على الاقل كنت نخرج مرتين في الأسبوع نمشي لبلاصة chic و مزيانة.... نفطر، نتعشى ....الخ

في الوضعية إلي أنا فيها تو، وليت نغزر للأشياء بنظرة مختلفة.
يعني ممكن وليت نقدر أكثر قيمة الفلوس. وليت نربط الخرجة بالإضافة متاعها عليا.
و نتسائل في كل مرة: هل بلحق وقت نمشي ناكل في بلاصة chic و مزيانة انا بش نتفرهد؟؟

و هل بلحق انا لازم نخرج كل اسبوع؟؟
و هل بلحق كي نخرج لبلاصة كيما هكا انا نتفرهد؟؟ و هل كان هاذي هي الطريقة الوحيدة بش انا نتفرهد؟؟ ....
برشا سؤالات في مخي ولاو يجيوني، برشا اسئلة جاهم الوقت و اطرحو في مخي، بيني و بين روحي...
برشا أفكار داخلة خارجة عليا ....

اما إلي أنا تعلمتو في المدة هاذي هو : الي انا في كل مرة نعمل الحاجة إلي أنا ترتحني . و بس 😁😁🙏
بابو بكل حب، في ايطار مشاركة أفكاري ✌️🤍🤍
#كتابات

Espace LIBRY By Babou

14/09/2023

03/09/2023

24/08/2023

07/08/2023

21/06/2023

27/05/2023

23/05/2023

Address

Telephone

Website

Alerts

Contact The Practice

Shortcuts

Share

Category