11/07/2021
انا طلعت بوزيتيف! شنوة نعمل لصغيري؟!
سؤال يجينيا عشرات المرات في اليوم للأسف انتشار واسع للكورونا في جل العائلات.
اولا، هل كورونا تضر الصغار؟
في البداية اعتقدنا انها لا تضر ابدا لكن مع انتشار السلالات الجديدة هناك عديد الضحايا من الرضع و الاطفال خاصة بالقيروان.
لكن اغلب الحالات تتعدى سلامات. مع ذلك يجب الاحتياط.
ثانيا، انا كورونا نرضع صغيري؟
نعم ترضع صغيرك عادي و ما تبعدوش عليك البس بافات و اغسل ايديك قبل ما تمسه ..
ثالثا، انا كورونا صغاري نبعدهم عليا؟ نبعثهم عند ميمتهم؟
لا. ما تبعدش صغارك عليك خليهم تحت عينيك نلبسوا بافات في الدار نقصوا مالبوس و التحميل نراقبوا صغارنا و ما نبعثوهمش ينشرو العدوى في ديار اخرين.
رابعا، انا كورونا. ولدي ما نعطيه شيً للمناعة؟
لا. ما تعطيه شي مادام ماثماش اعراض.
استعمال مكملات اعشاب للمناعة مش غالط اما ماثمة حتى دوا اثبت نجاعته للحماية.
اذا مصرين تعطيوهم حاجة، نقترح
Oscillococcinum. 1 dose/j. 6j.
او مكملات اعشاب مثل
Gripoff, imunex, phytogrip, physiokid vitC..etc..
اما ننصحو باستعمالهم خاصة اذا ثمة اعراض من دون اعراض زايد ، لا للمضادات الحيوية راهي تنجم تعكر الحالة اذا ما يستحقهاش الصغير .
خامسا، شنية اعراض الكورونا عند الصغار؟
سخانة،رشح، كحة ،اسهال، طفح جلدي مع سخانة، وجايع، فشلة..
شنية نعمل كي نشك في صغيري مريض.؟ نعمله تيست ؟ ناخذله دواء ؟
لا. التيست مش لازم في اغلب الحالات بالنسبة للصغار الا في حالات يحددها الطبيب و ما ناخذوش الدواء وحدنا.
تهز تعدي على صغيرك يمكن الطبيب يلقا تشخيص اخر و ينصحك بالدواء اللازم لحالته باش ما يتعكرش.
سادسا، انا كورونا عملت التيست و كي جا بوزيتيف خذيت وحدي شكارة دواء.
رد بالك... برشة حالات تعكرت و برشة وفيات صارت على خاطر الاستهتار هذا.
تمشي لطبيب، يكشف عليك يعرف في انا مرحلة انت..يعرف امراضك و بدنك اش فيه.. يقيسلك الاكسيجين..ينجم يطلب تحاليل اخرى او سكانير.. ينجم يمنع عليك دوايات تعكر حالتك..
و اخيرا.. عيشكم.. صغير مريض في الدار..كورونا ولا غيرو..ما نطيشوهش، رانا ما نرفضوش انا نشوفوه في العيادة.. ما نخليشي في الدار يقلي بالسخانة ولا يكح في حالة قال شنوة ما نحبش نخرج بيه تتصل بطبيبك ما تخبيش عليه اللي انت مريضة و ممكن عديتو و هو تو يعمل اللازم....
كان قلك جيبه جيبه. كان قلك اعطى كذا و راقب ....
ان شاء الله صغارنا لباس و ربي يستر كل عائلة فيها مريض...
بشوية وعي و التزام نغلبوه انشاء الله.
