04/04/2025
ايجا نحسبوها :
10 أيامات في الفليبين 🇸🇽 بلد 7641 جزيرة
يتكلفوا 4500 دينار ( 1400$) بتسكرة الطيارة، ساكن واكل شارب و عامل زيارات باهين، و ممكن حتى ب 3000 دينار ( 950$) اذا ما تتدللش في السكنة و الماكلة.
ايا احسب معايا فواياج 10 أيام :
- تسكرة الطيارة: 2000 دينار. عادة ايسكال في جدة، الدوحة، دبي او إسطنبول حسب الشركة.
أرخص شركة تلقاها على skyscanner.com
- من غير الفيزا للتوانسة.
- السكن : Hotels.com و أوتيل نظيف محترم في الأحياء المزيانة و السياحية من 50$ الليلة (150 دينار) و انت ماشي.
او hostelworld.com اذا عندك عقلية backpacker و ما يقلقش الشنابر الجماعية عليك بهوستيل : 15$ الليلة hostelworld.com
- الماكلة بالنهار :
الشعبي الشعبي و الستريت فود : 30 دينار من فطور الصباح للعشاء
المتوسط : 60 دينار النهار، و اذا تحب على الريستورونات الغالية موجود من 150 دينار و انت ماشي.
- النقل المحلي :
المطار إلى المدينة 15$ ( 45 دينار ) بالتاكسي، لكن فما الكار العمومي الباص أرخص برشا، و فما الكار الخواص.
الموبيلات او الموطور : نتع محواسة في وسط البلاد 1 الى 2$ الكورسة.
تاكسي: عندك تطبيق قراب Grab او تنجم توقف تاكسي على روحك.
النقل بين المدن :
الفلبين ارخبيل مزيان برشا متكون من أكثر من سبعة آلاف جزيرة يعني التنقل أغلبه باش يكون بالطيارة و حسب تجربتي أحسنهم Air Asia او Philippines Airlines و Cebu air أغلى شوية، تنجم تلقى تساكر ب 100 دينار one way. المهم تقص على بكري. و ممكن حتى أرخص.
ممكن تتنقل بالباطو bateaux بين الجزر، يأخذ شوية وقت و أرخص من الطائرة.
- الجزر إلي ننصح بزيارتهم : بوراكاي Boracay، بالاوان Palawan، كورون Corone، سيارغاو Siargao، سيبو Cebu، لوزون Luzon وين موجودة العاصمة مانيلا Manilla. و أكيد برشا أخرين من أزين ما تشوف.
الحسبة توة :
الميزانية الصغيرة للي يحب جو Backpacker دينار 3000 بالتسكرة.
الميزانية المتوسطة للي يحب يسكن في اوتيل متوسط صنف ثلاثة نجوم 4000 دينار بالتسكرة بكل شيء...
النزل أربعة و خمسة نجوم أغلى بالطبيعة من 200 دينار الليلة و انت ماشي.
اذا تحب تطلعلك أرخص امشوا زوز أشخاص تتقاسموا السكنة تطلع شطر الحق.
ننصحكم تشوفوا الزيارات و الأماكن إلي تشوفها على GetYourGuide.com.
أحسن فترة لزيارة الفلبين : من نوفمبر إلى مارس. فما زوز فصول : فصل سخون و ممطر إلي ممكن يكون فيه اعاصير و فصل سخون و جاف.
هاذي إلي عشته من خلال زياراتي الثلاثة للفلبين إلي نعتبرها أحسن دولة تساعد التونسي على جميع الأصعدة.
اذا فما اي معلومة أخرى و تصحيح مرحبا بيكم و شكرا مسبقا.
سافر بالتونسي و ديما يمشي...
