13/09/2025
السلبية⁉️
ناس بزاف تقولي نحس روحي سلبية ونشوف كلش بنظرة تشاؤم ونلوم روحي على كل شيء❗️❗️
🔹️ السلبية هي أحد التشوهات المعرفية يعني وكأنو واحد يلبس نظارة التشاؤم ويشوف بيها كل حياتو، في كل زاوية يلقى نقطة سلبية، مشكل، أو أزمة.
🙅♀️🙅♂️ هذه الطريقة في النظر للمشاكل طريقة لاتكيفية يعني غير فعالة ماراهيش رايحة تحل المشاكل على العكس رايحة تلعب على المزاج تاع الإنسان وتزيد من حجم المشكلة، اذن لاه الدماغ يستعملها؟
▪️الدماغ البشري يمشي بما يدعى الانتقاء السلبي يعني يحوس على لحوايج الخطيرة في كل شيء باه يحمينا وهاذي الخاصية كانت في الانسان القديم ومشات معانا حتى لضك كوسيلة حماية لازملو يركز على الخطر في أي حاجة تصرا معانا.
▪️التفكير السلبي يستعلمو ايضا المخ باه يهرب من مواجهة المشكل يعني يصمطلك المشكل ويعقدهولك باه يحسسك بالعجز والضعف تولي تهرب منو كأسلوب حماية ليك ايضا، ومنه يخليه تتجنب هاذو المشاكل.
▪️نستعملوها أيضا باه نتحكو في كل تفاصيل الحياة والحوايج لي يصراو معانا، وكأنو لازم علينا نتحكمو في كلش، وكلش لازمو يمشي كيما رانا حابينو وإلا نحسو بالعجز وفقدان السيطرة.
يستعملها الدماغ أيضا باه يحمينا ويبعدنا من أن نرفع سقف التوقعات تاعنا يعني مانحلموش بزاف باه مانتألموش بزاف ومنه كل حاجة نحب نديرها أو نبداها الدماغ يستعمل هاذي الطريقة باه يبعدني منها كون نخسر فيها أو نفشل.
🔸️ و كيما نقولو دائما كأخصائيين التقبل هو أول خطوة للعلاج، أنك تعرف أنو لكل سلوك سبب (وربما السبب كان خارج على يديك وانت ماعندك حتى ذنب أنو صرالك)، وأيضا إنك تعرف أنو صراعك مع نفسك وتأنيبك ليها ماراهوش رايح يحل المشكل بالعكس رايح يخليك تركز فيه أكثر وفي النقاط السلبية تاعو؛ وكي تركز فيه بطبيعة الحال مخك رايح يكبرهولك ويضخمهولك وتولي حاس روحك: خلاص يائس من هذا المشكل وتعتقد بلي ماراكش رايح تلقالو حل ‼️
🔹️ إذن أول خطوة نحو الراحة النفسية أني نشوف وش صرا بعين الفاحص الفضولي ونعرف وين نقدر نتدخل باه نحل المشكلة والدماغ تاعي لاه راهو يدير هكذ، وليس أني نقعد نلوم في روحي فقط، لأني في النهاية ماعنديش حل غير التقبل لوش صرا ثم البحث عن العلاج❗️
الأخصائية النفسية
