الدكتور أحمد عليان عيد Dr. Ahmed Alian Eid

04/18/2026

رقم (742)
*"لأنك مش لحالك… كلمة بتطمن وقلب بيرتاح"*

✍️ *د. أحمد عليان عيد*
**أخصائي واستشاري الصحة النفسية - غزة**

العنوان:
*ليش العمل التطوعي طريق راحة نفسية… وقرب من ربنا؟*

كثير منا بهالوقت الصعب اللي بنعيشه،
بيسأل:
ليش أتطوع؟
ليش أساعد غيري وأنا نفسي محتاج؟

بس الحقيقة الأعمق:
التطوع مش بس عطاء للناس…
هو عطاء لنفسك قبل أي حد.

*أولًا: ليش التطوع مهم إنسانيًا؟*

لأننا بشر،
وبنحتاج بعض.
لما تساعد غيرك:
بتخفف ألمه
وبتخفف عن حالك كمان
وبتحس إنك مش عاجز
العطاء بيرجّع للإنسان إحساسه بالقيمة،
خصوصًا في وقت بيحس فيه إنه ضعيف أو محاصر.

*ثانيًا: شو علاقته بالإسلام؟*

ديننا من البداية حثّ على الخير،
وعلّمنا إن أفضل الناس هم اللي بينفعوا غيرهم.
النبي ﷺ قال:
*"أحب الناس إلى الله أنفعهم للناس"*
وقال كمان:
*"والله في عون العبد ما كان العبد في عون أخيه"*

يعني كل مساعدة بتقدمها،
هي مش بس للناس…
هي علاقة بينك وبين ربنا.
حتى أبسط الأشياء:
* كلمة طيبة
* مساعدة صغيرة
* وقفة جنب حدا محتاج
* حفل ترفيهي للاطفال
* توعية وتثقيف
* وقوفك مع فريقك حتى لو ماعملت شيء
كلها محسوبة… وكلها إلها أثر كبير.

*ثالثًا: الفائدة النفسية للتطوع*
من خلال خبرتنا،
الإنسان لما يعطي، بيحس بـ:
* راحة نفسية
* هدوء داخلي
* تقليل القلق والتوتر
* إحساس بالمعنى
* قوة بدل العجز
* التطوع نوع من العلاج النفسي…
بس بطريقة إنسانية وبسيطة وبدون مايكون في استغلال للطاقة.

في واقعنا الحالي بقطاع غزة
إحنا اليوم بنعيش ألم كبير.
خسارة، خوف، ضغط…
بس رغم كل هذا،
لما شاب يساعد، أو يواسي، أو يشارك…
هو مش بس بيساعد غيره فقط،
هو بيحافظ على إنسانيته.
واللي بيحافظ على إنسانيته بهيك وقت…
هذا إنسان قوي وأجره كبير عند ربنا.

*ختاماً رسالة إلك*
إذا حسّيت إنك تعبان… جرّب تعطي.
مش لأنك كامل،
لكن لأن العطاء بيداوي.
وإذا ساعدت حدا،
تذكر إن ربنا شايفك،
ومش رح يضيع تعبك.
خلي نيتك صافية،
وعملك بسيط،
وأثرك كبير.

*دمتم بخير ودفء نفسي دائم*
#د.أحمد_عليان_عيد

02/08/2026

12/11/2025

رسالة لأهلنا وأحبابنا في قطاع غزة…
اليوم الشباب معكم في


مبادرة الشباب اللي قرروا يكونوا واقفين جنب أهلهم باللي بيقدروا عليه.
يمكن ما نملك إمكانيات كبيرة، ولا أدوات ميدانية…
بس اللي عنا أهم:
صوتنا، كلمتنا، إحساسنا، وتعاطفنا الحقيقي مع الناس.

إحنا دورنا نكون صوت ووقفِة مع أهلنا…
قلوبنا معكم بكل لحظة.

مبادرتنا دعم معنوي ونفسي، كلمة بترفع معنويات، رسالة بتخفّف توتر، دعوة من القلب توصل لحدا محتاج يسمع إنه مش لوحده.

وإن شاء الله الكل يضل بخير وسلامة…
وإن شاء الله نقدر نكمّل مشوارنا كشباب قادرين يصنعوا أثر حتى بأبسط الطرق.

مؤسسة مبادرة الجيل الفلسطيني الموحد
د. أحمد عليان عيد








ٍ_على_النازحين

10/29/2025

رقم (713)
*"لأنك مش لحالك… كلمة بتطمن وقلب بيرتاح"*

✍️ *د. أحمد عليان عيد*
**أخصائي واستشاري الصحة النفسية - غزة**

العنوان:
رجع القصف... ورجع الخوف والتوتر

السبب:
مع رجوع القصف والدمار فجأة بترجع كل مشاعر التوتر والوجع، خصوصًا عند الأطفال اللي بيتأثروا من أقل صوت. الأهل نفسهم بيحسّوا بالعجز، وبيحاولوا يخفوا خوفهم علشان ما يخلّوا الصغار يقلقوا أكثر.

للتعافي:

بهالظروف، أهم خطوة هي نطمن أطفالنا ونخليهم يحكوا، حتى لو كلام بسيط أو دمعة.
نسمعهم بدون ما نستهزئ بخوفهم، نحتضنهم، ونأكدلهم إنو إحنا معاهم، وإنو الله هو الحامي.
نقدر نستخدم فكرة من العلاج المعرفي السلوكي، وهي نحاول نبدّل الفكرة المخيفة بأفكار فيها أمل وثقة بالله، مثل:
"يمكن الوضع بخوّف، بس الله ما بينسانا، واللي مرّينا فيه زمان ونجونا، رح ننجو كمان."

ضروري كلامنا نربطه بالإيمان، لأنّ الذكر والدعاء بيهدّوا النفس وبيعطوا القلب طمأنينة.

رسالة إلك:

يمكن الخوف رجع إلنا أو للناس اللي حولينا، بس انت مو نفس الشخص اللي خاف أول مرة...
اتعلمت كيف تهدّي غيرك، وكيف توقف رغم التعب.
خليك ثابت، واحكي لنفسك كل مرة:
"الله معي... وأنا أقدر أكمّل."

*دمتم بخير ودفء نفسي دائم*
#د.أحمد_عليان_عيد

10/14/2025

رقم (710)
*"لأنك مش لحالك… كلمة بتطمن وقلب بيرتاح"*

✍️ *د. أحمد عليان عيد*
**أخصائي واستشاري الصحة النفسية - غزة**

العنوان:
كيف نرجع نثق بالواقع بعد الحرب؟

بعد كل اللي مرّينا فيه… من خوف ونزوح وفقدان،
صار الشعور بعدم الأمان طبيعي جداً.
بنستيقظ على أخبار غير واضحة، وبننام وإحنا مش عارفين شو جاي بكرة.
الثقة بالحياة اتكسرت شوي شوي…
بس حتى بعد أصعب التجارب، الحياة بتستحق نعيد بناءها.

ليش فقدنا الثقة؟

لأن الحرب أخذت منا أشياء غالية:
البيت، الذكريات، الأمان، الناس الي بنحبهم، وحتى الإحساس بالسيطرة على المستقبل.
العقل بصير يتوقع الأسوأ، والجسم بيعيش على أعصابه طول الوقت.
بس تذكّر، هالآلية الدفاعية هدفها تحميك، مش تعذّبك.
والتعافي بيبدأ لما نحكي لأنفسنا: "أنا بخاف… بس رح أكمّل."

كيف أقدر أرجّع ثقتي بالحياة؟

1. ابدأ بخطوات صغيرة:
روتين بسيط، ترتيب مكانك، تزرع أي شيء حتى لو فلفل، أو تحكي مع شخص بتحبه.
العقل بيربط هاللحظات الصغيرة بالإحساس بالأمان.

2. قلّل التوقعات السوداوية:
لما يجيك تفكير "القادم أسوأ"،
بدّله بـ "يمكن في صعوبة، بس كمان في أمل."
هاي إعادة برمجة معرفية، بتخفف التوتر تدريجياً.

3. استرجع لحظات السلام:
لو حتى لحظات بسيطة وسط الفوضى،
مثل ضحكة طفل، أو وقت صلاة هادي…
ركّز عليها، لأن المخ بيتعلّم يسترجعها وقت الخوف.

4. قرّب من الله بدون شروط:
مش لازم تكون قوي لتقترب… روح بضعفك،
واحكي له كل وجعك، لأن الطمأنينة الحقيقية بيقينك وتوكلك على الله.

5. ذكّر نفسك:
الثقة ما بترجع فجأة، لكنها تكبر كل يوم شوي.
كل مرة بتقوم بعد وجع، بتصير أقوى من قبل.

رسالة إلك:
يمكن الدنيا حوالينا لسه مش ثابتة،
بس جواك في نقطة أمان اسمها الإيمان.
هي اللي بتخليك توقف رغم التعب، وتكمل رغم الألم.
صدقني، الأيام الصعبة ما بتقتل الحياة… هي بتعلّمنا نعيشها بوعي أعمق.
وما زال في أمل، لأنك لسه موجود… ولسه بتحاول وقادر تعمل كل شيء.

*دمتم بخير ودفء نفسي دائم*
#د.أحمد_عليان_عيد

10/12/2025

رقم (708)
*"لأنك مش لحالك… كلمة بتطمن وقلب بيرتاح"*

✍️ *د. أحمد عليان عيد*
**أخصائي واستشاري الصحة النفسية - غزة**

العنوان:
لو رجع الخوف… كيف نحافظ على هدوءنا وسط التهديدات؟

يمكن الهدوء رجع شوي، لكن الأخبار والتهديدات بتخلينا نحس إن الخطر ممكن يرجع بأي لحظة.
نبض القلب يتسارع، التفكير يزيد، والذاكرة تشتغل… كأن الجسد والنفس بيقولوا: "لسه ما ارتحنا والحرب ممكن ترجع."

وهذا طبيعي.
لأن اللي عاش صدمة، بيضل داخله جهاز إنذار شغّال حتى لما الموقف يخف.
لكن مع الوقت والتدريب، بنقدر نعلّم عقلنا ونفسنا كيف نرجع نعيش اللحظة بدون خوف من القادم.

ليش بيصير معنا هيك؟

لأن الخوف هو ردة فعل دفاعية، بتحاول تحمينا من الألم.
بس لما يطول، بصير يستنزفنا بدل ما يحمينا.
علشان هيم لازم نعيد التوازن بين الحذر الواقعي و الهدوء الداخلي.

كيف نحافظ على الهدوء لو رجعت التهديدات؟

1. خفّف التوقّع المستمر: لا تحاول تتنبأ شو ممكن يصير، ركّز على اليوم فقط وحياتك الحالية.

2. ثبّت نفسك بالواقع: ركّز على صوتك، أنفاسك، الأشياء حوليك — لانه بترجعك للواقع الحالي علشان تساعدك ماتفكر ببكرة.

3. بدّل الخوف بإيمان: ردّد “لن يصيبنا إلا ما كتب الله لنا”…
الإيمان مش بس طمأنينة، هو درع نفسي يحميك من الانهيار.

4. خطّط بهدوء: خليك مجهّز للطارئ، بس لا تعيش كأن الطارئ صار.

5. ابحث عن الصحبة الهادية: خليك مع ناس بتخفف التوتر مش بتزيده، لأن الهدوء معدي مثل الخوف.

رسالة إلك:

يمكن الخوف يرجع، ويمكن الأخبار تقلقنا، بس الأمان الحقيقي ما بيبدأ من حولينا…
بيبدأ من داخلنا احنا لما نقول: “يا رب، تولّ أمري.”
خليك هادي، واذكر دايمًا:
اللي نجا من الدمار الشامل، بيقدر يوقف بثبات حتى لو رجعت الأمور صعبة.

*دمتم بخير ودفء نفسي دائم*
#د.أحمد_عليان_عيد

09/07/2025

‏اللهم اجعل لنا في الأيام القادمة فرحا وتيسيرا وتوفيق ، وأزح ڪل هم اثقل عاتقنا ، واصرف عنا ڪل سوء وخيبه.
اللهم طوقنا بالسلام والطمأنينة والنور ، اللهم تولنا فيمن توليتهم الذين لا خوف عليهم ولا هم يحزنون.
اللهم تحقيق الأمنيات التي أودعناها إليك وأنت الڪريم الوهاب.
اللهم صل وسلم وبارك على نبينا وحبيبنا محمد
اسعد الله صباحكم بكل خير وبركة يارب