10/01/2025
تحتج بطريقة سلمية من حقك، تخرب وتسرق لا.
رد بالك انت ووطنك مستهدف من أكثر من جهة.
أعداء المغرب كثر، ومتقارنش المغرب بدول أوربية أو غربية، معظم تلك الدول مصدر ثروتها الاقتصادية والمالية من الحقبة الاستعمارية لإفريقيا وآسيا..
أما المغرب بنى و يبني نفسه بنفسه ماشي بثروات الغير.
التعليم و الصحة في المغرب بالمجان، في أمريكا وأستراليا لا وأنا أتحدث عن تجربة بحكم أني عشت في هذه الدول..
في أمريكا بغيتي تكمل دراستك الجامعية تيقولو ليك ضرب يدك لجيبك ولا نسلفوك student loan ومني تخدم رجع لنا رزقنا تقدر توصل حتى 500 ألف دولار كقرض لدراسة. وبز منك غادي ترجعها عن طريق payment plan, هذه في نظري هي قمة العبودية، انت ملك لهم مذا الحياة، العبودية عندهم عندها لون وشكل آخر ماشي لي كتظن أنت فيها في المغرب.
المتشردين والمتسولين لي كاينيين في أمريكا مكاينينش في المغرب وكياكلو حتى من طارو ديال زبل وتينعسو في الشارع…
إلا معندكش health care التغطية الصحية يعني غادي تمشي تشد النوبة مع خوتك، إيه في مريكان ناس كيشدو النوبة ويتصناو لشهور الموعد ديالهم معدا إلا بغيتي تمشي داوة في القطاع الخاص أنداك غادي تحط ذم جوفك.
أما إلا عيطتي لسيارة الإسعاف كون هاني غادة تجي في أقرب وقت ويدوك تداوة ولكن غادي ينزلو عليك بالألاف من الدولارات أي الملايين من الدراهم مني تخرج من سبيطار وبز منك غادي تخلص.
البطالة والفقر والغلاء في هذه الاونة في جميع بلدان العالم والكل يعاني من ويلاتهم.
الضرائب كتقتطع بشكل دائم من راتبك الشهري وفي كل وقت وزمان، تشري قرعة الماء ولا قميجة تخلص علها الضريبة city taxes، تستعمل القنطرة أو brigade تخلص، تخرج تعشا على برا تخلص tax, تشري دار تخلص الضريبة تبيعها تخلص الضريبة، تباركي السيارة بطريقة عشوائية غادي تخلص heavy fine وزيد وزيد وزيد..
بطريقة احتجاجك ألا سلمية أنت تفتح باب الفوضى وعدم الاستقرار وتضيف كارثة أخرى للبلد وتزيد الطين بلة.
مرة أخرى أقول لك أخي وأختي حذاري ثم حذاري، نعمة الأمن والأمان نعمة عظيمة لا يعرف قيمتها إلا الذي ذاق مرارة الحروب و عدم الاستقرار.
الزرواطة أحيان تصبح شراً لابد منه لكل من تسول له نفسه العبث بأمن البلاد والعباد وهي موجودة حتى في الدول الغربية التي يتبجح بها البعض.
الإصلاح الاجتماعي و الاقتصادي والسياسي والعيش بكرامة يأتي بالتدريج لا بالفوضى والبلبلة وحنا المغاربة تنقولو (مني كطيح البگرة كيكثرو الجناوة)
وما أكثر جناوة ضايرة بنا..
الإصلاح و محاربة الفساد كيبدأ منك أولا مني يجي المرشح يدق باب الدار باش تصوت عليه سولو هاد الأسئلة !
ماهوا المستوى الدراسي ديالو؟
آش ناهو البرنامج ديالو؟
وشن تجربتو في الحقل السياسي واش عندو شي خدمة أخرى تقدر تشغلو على المهمة ديالو كمرشح إنتخابي؟
فين هو المقر ديل المكتب ديالو باش تواصل معاه إلا حتاجيتي باش تناقش معاه شي موضوع يخص الشأن العام..
و أسئلة من هذا القبيل باش تعرف مستواه الفكري والسياسي وحتى public speaking وداك الشي..
* نعم لتغير
* نعم للإصلاح
* نعم للعيش بكرامة
* لا وألف لا لتخريب
اللهم إني قد بلغت اللهم فاشهد.
الله، الوطن، الملك 🇲🇦🇲🇦🇲🇦
#المملكةالمغربية
