Kolegji i Kirurgëve të Kosovës / Kosova College of Surgeons

21/05/2026

U MBAJTË TRYEZA SHKENCORE PËR MENAXHIMIN E MELANOMËS

Kolegji i Kirurgëve të Kosovës mbajti Tryezën Shkencore për Menaxhimin e Melanomës, duke bërë bashkë ekspertë të fushave të ndryshme mjekësore që shqyrtuan trajtimin e këtij tumori malinj me vdekshmëri të lartë në fazat e përparuara.

Diskutimet e ligjëruesve sipas klinikave dhe instituteve specifike u fokusuan në këto shtylla kryesore:

Dermatovenerologji: Asst. Dr. Sidita Sopjani dhe Asst. Dr. Reihane Bislimi Berisha theksuan se në fazat e hershme melanoma kurohet plotësisht vetëm me kirurgji. Rol kyç luan dermatoskopia, një metodë jo-invazive, e lehtë dhe me saktësi të lartë që aplikohet në klinikë. Ato bënë thirrje për fushata ndërgjegjësimi kundër dëmtimit nga rrezet ultraviolete (UV) dhe veçanërisht solariumet.

Radiologji: Dr. Shkendije Nuza prezantoi mundësitë imazherike (ultratingulli, CT, MRI dhe PET-scan) që përdoren në klinikë për vlerësimin e shtrirjes sistemike të sëmundjes, çka është vendimtare për përzgjedhjen e strategjisë terapeutike.

Patologji Klinike: Asst. Dr. Merita Hashani Bacaj referoi mbi rëndësinë e diagnostikimit definitiv përmes ekzaminimeve mikroskopike, imunohistokimike dhe gjenetike, si dhe mbi stadifikimin e sëmundjes si faktorin kyç për zgjedhjen e trajtimit bashkëkohor.

Kirurgji Plastike dhe Rekonstruktive: Dr. Sanije Abazi McMillion ndau përvojën e klinikës në trajtimin e suksesshëm kirurgjikal të pacientëve me melanomë.

Onkologji Mjekësore: Asst. Dr. Ilir Kurtishi dhe Prof. Asst. Dr. Faton Sermaxhaj prezantuan rezultatet premtuese të mjekimit bashkëkohor të melanomës metastatike me terapi të shënjestruar ("target") dhe imunoterapi, të cilat tashmë zbatohen në klinikë.

Radio-Onkologji: Dr. Arta Kameri Jusufi shpjegoi indikacionet dhe mënyrën e trajtimit me rrezatim (radioterapi) për pacientët që kanë nevojë për këtë modalitet.

Konkluzionet Kryesore të Tryezës

Trajtimi Multidisiplinar (Tumor Bordi): Menaxhimi i suksesshëm i melanomës mund të bëhet vetëm përmes një bashkëpunimi të ngushtë ndërmjet të gjitha disiplinave mjekësore.

Regjistri Nacional: Ekspertët apeluan njëzëri për krijimin e Regjistrit Nacional të Melanomës në Kosovë.

Ngjarja mblodhi një numër të madh pjesëmarrësish: dermatologë, radiologë, kirurgë, patologë, onkologë, mjekë familjarë, infermierë, specializantë dhe studentë, diskutimet e të cilëve pasuruan këtë tryezë e cila synohet të shndërrohet në një forum shkencor të përvitshëm.

17/05/2026

🟦 TRYEZA SHKENCORE PËR MENAXHIMIN E MELANOMËS 🟦

Kemi kënaqësinë t'ju ftojmë të merrni pjesë në Tryezën Shkencore për Menaxhimin e Melanomës, që do të mbahet të Martën më 19 Maj 2026, nga ora 09:00 deri në 13:00, në Amfiteatrin e Telemjekësisë, Prishtinë.

Kolegji i Kirurgëve të Kosovës/Komiteti për Kancer organizojnë këtë aktivitet të rëndësishëm që do të bashkojë profesionistët tanë për të diskutuar përparimet dhe praktikat më të fundit në menaxhimin e melanomës.

🔹 Transmetimi i drejtpërdrejtë do të jetë i disponueshëm në qendrat rajonale të Telemjekësisë.
🔹 Tryeza është e akredituar nga Oda e Mjekëve të Kosovës (OMK) me 9 pikë aktive dhe 7 pikë pasive.
🔹 Pjesëmarrja është e hapur për ata që janë anëtarë të Kolegjit të Kirurgëve të Kosovës.

12/05/2026

U mbajt sesioni i Ciklit të Ligjëratave nga fusha e ortopedisë dhe urologjisë.

Temat që u trajtuan ishin:
• Teknikat kirurgjikale në vendosjen e protezës së gjurit – Ast. Dr. Nderim Salihaj
• Menaxhimi i traumave (lëndimeve) të veshkave, ureterëve dhe fshikës urinare – Prof. Asoc. Petrit Nuraj

Ҫdo muaj i dedikohet specializimeve ose temave të ndryshme, ndërsa ligjëratat mbahen nga anëtarë të Kolegjit të Kirurgëve të Kosovës dhe ekspertë ndërkombëtarë të fushave përkatëse.

11/05/2026

Cikli i Ligjëratave vazhdon këtë të Martë, 12 Maj, nga ora 12.00, me sesionin e radhës nga fusha e ortopedisë dhe urologjisë.

Temat që do të trajtohen janë:
• Teknikat kirurgjikale në vendosjen e protezës së gjurit – Ast. Dr. Nderim Salihaj
• Menaxhimi i traumave (lëndimeve) të veshkave, ureterëve dhe fshikës urinare – Prof. Asoc. Petrit Nuraj

Ҫdo muaj i dedikohet specializimeve ose temave të ndryshme, ndërsa ligjëratat mbahen nga anëtarë të Kolegjit të Kirurgëve të Kosovës dhe ekspertë ndërkombëtarë të fushave përkatëse.

Ligjëratat zhvillohen në Amfiteatrin e Qendrës Kombëtare të Telemjekësisë së Kosovës dhe transmetohen njëkohësisht në Qendrat Rajonale të Telemjekësisë në Kosovë.

Cikli i ligjëratave mujore të KKK-së është i akredituar nga OMK.

07/05/2026

U mbajt moduli 7 dhe 8 i Kursit të Shkathtësive Themelore në Kirurgji 2026, i organizuar nga Kolegji i Kirurgëve të Kosovës.

- “Vendosja e drenit torakal” me ligjërues: Dr. Besri Osmani

- “Menaxhimi kirurgjik i rrugëve ajrore / cricothyrotomia & tracheostomia” me ligjërues: Dr. Etnik Bajraktari.

Ky kurs i dedikohet specializantëve dhe studentëve të mjekësisë.

04/05/2026

Nënkryetari për Zvicër i Kolegjit të Kirurgëve të Kosovës, Prof. Dr. Alban Neziri, gjatë një vizite në Tokio zhvilloi takime me dy figura të shquara të kirurgjisë onkologjike të gjirit në Japoni, Prof. Dr. Masakazu Toi, Drejtor në Tokyo Metropolitan Cancer and Infectious Disease Center, Komagome Hospital, si dhe Prof. Dr. Hiroko Masuda, shefe e repartit të kirurgjisë së gjirit në të njëjtin institucion.

Në kuadër të këtyre takimeve u diskutua mundësia e pjesëmarrjes së tyre si ligjërues të ftuar në Simpoziumin e Tretë të Kancerit të Gjirit që do të mbahet sivjet gjatë muajit Tetor në Prishtinë, dhe në Kongresin e Dytë të Kirurgëve Shqiptarë në Tiranë. Po ashtu, u trajtua edhe potenciali i përfshirjes së tyre në rol konsultativ në proceset për standardizimin e procedurave diagnostike dhe trajtimit të kancerit të gjirit në Kosovë.

Një vëmendje e veçantë iu kushtua edhe zhvillimit të një programi të strukturuar bashkëpunimi ndërmjet Kolegjit Pan-Shqiptar të Kirurgëve, qendrave të specializuara të gjirit në Tokio dhe Kioto, si dhe Shoqatës Japoneze të Kirurgëve të Gjirit, me fokus në krijimin e mundësive për trajnime të avancuara dhe programe shkëmbimi profesional për kirurgët nga rajoni ynë.

Ky bashkëpunim potencial përfaqëson një hap të rëndësishëm drejt ngritjes së kapaciteteve profesionale dhe avancimit të praktikave bashkëkohore në trajtimin e kancerit të gjirit në Kosovë dhe rajon.

30/04/2026

Kryetari Themelues i Kolegjit të Kirurgëve të Kosovës dhe i Kolegjit Pan-Shqiptar të Kirurgëve, Prof. Dr. Rifat Latifi, mori pjesë në Kongresin e 2-të Ndërkombëtar të Shkencave të Shëndetit, i mbajtur në Tiranë më 24, 25, dhe 26 prill, dhe i organizuar nga Universiteti i Mjekësisë, Tiranë.

Në kuadër të seancës plenare të hapjes së kongresit, Prof. Latifi mbajti ligjëratën me titull “The Bibliometric Lens of Research and Scientific Papers: What does really matter?”, e cila u karakterizua nga një qasje analitike dhe u prit me interes të theksuar nga komuniteti akademik pjesëmarrës.

Në përmbyllje të kësaj seance, në vlerësim të ligjëratës së mbajtur dhe kontributit të tij shumëvjeçar në zhvillimin e shkencës shqiptare, Prof. Dr. Latifi u nderua me Çmimin e Artë të Kongresit, i akorduar nga Rektori i Universitetit të Mjekësisë në Tiranë, Prof. Dr. Xheladin Draçini.

27/04/2026

22/04/2026

“DEKORATË PËR ARRITJE SHKENCORE” PËR PROF. DR. LUMNIJE KQIKU

Kemi kënaqësinë të ndajmë lajmin për një arritje të jashtëzakonshme të Prof. Dr. Lumnije Kqiku, e cila është nderuar me “Dekoratë për Arritje Shkencore” nga Oda e Stomatologëve të Kosovës, për kontributin e saj të shquar në fushën e shkencave mjekësore në nivel ndërkombëtar.

Ky vlerësim prestigjioz është dëshmi e përkushtimit, profesionalizmit dhe punës së palodhur të saj ndër vite, duke kontribuar jo vetëm në avancimin e shkencës, por edhe në ngritjen e standardeve profesionale në këtë fushë.

Prof. Kqiku, në rolin e saj si nënkryetare e Kolegjit të Kirurgëve të Kosovës për Evropë, Kryetare e Bordit Drejtues të Qendrës për Kërkime, Simulime dhe Trajnime të Avancuara Kirurgjike të Kosovês, dhe Redaktore e Asociuar e Kosova Journal of Surgery, vazhdon të jetë figurë kyçe në zhvillimin akademik dhe profesional, duke ndikuar drejtpërdrejt në edukimin dhe avancimin e brezave të rinj të profesionistëve shëndetësorë.

Kolegji i Kirurgëve të Kosovës me krenari uron Prof. Kqiku për edhe një çmim të rëndësishëm, dhe njëherit shpreh mirënjohjen e thellë për kontributin e saj madhor në zhvillimin e organizatës dhe projekteve tona.

15/04/2026

U mbajt sesioni i Ciklit të Ligjëratave nga fusha e neurokirurgjisë dhe kirurgjisë së fëmijëve:

• Neurokirurgjia e Kraniosinostozave – Dr. Shefki Dragusha & Driton Avdyli
• Atrezioni i ezofagut – Dr. Besnik Maloku

Ҫdo muaj do t’i dedikohet specializimeve ose temave të ndryshme, ndërsa ligjëratat mbahen nga anëtarë të Kolegjit të Kirurgëve të Kosovës dhe ekspertë ndërkombëtarë të fushave përkatëse.

10/04/2026

Vazhdojmë me sesionin e radhës të Ciklit të Ligjëratave këtë të Martë, 14 Prill, nga ora 12.00, me ligjërata nga fusha e neurokirurgjisë, ortopedisë dhe kirurgjisë së fëmijëve.

Temat që do të trajtohen janë:
• Neurokirurgjia e Kraniosinostozave – Dr. Shefki Dragusha
• Teknikat kirurgjikale në vendosjen e protezës së gjurit – Ass. Dr. Nderim Salihaj
• Atrezioni i ezofagut – Dr. Besnik Maloku

Ҫdo muaj i dedikohet specializimeve ose temave të ndryshme, ndërsa ligjëratat mbahen nga anëtarë të Kolegjit të Kirurgëve të Kosovës dhe ekspertë ndërkombëtarë të fushave përkatëse.

Ligjëratat zhvillohen në Amfiteatrin e Qendrës Kombëtare të Telemjekësisë së Kosovës dhe transmetohen njëkohësisht në Qendrat Rajonale të Telemjekësisë në Kosovë.
Cikli i ligjëratave mujore të KKK-së është i akredituar nga OMK.