QKMF "Dr.Vezir Bajrami" Shtime

15/09/2025

📍 Sot me datë 15.09.2025 në sallën e trajnimeve të Qendrës Kryesore të Mjekësisë Familjare “Dr. Vezir Bajrami” në Shtime u mbajt një sesion informues me temën “Hipertensioni Arterial” 🫀, ku Dr. Qendrim Bajrami ndau këshilla të vlefshme për parandalimin, matjen e rregullt të tensionit dhe rëndësinë e stilit të shëndetshëm të jetesës.

💡 Qëllimi i këtij takimi ishte të rrisim ndërgjegjësimin për kujdesin ndaj presionit të gjakut dhe parandalimin e komplikimeve që sjell hipertensioni.

Faleminderit të gjithëve për pjesëmarrjen dhe interesimin!

Ky aktivitet u mbështet nga AQH Project🤝 dhe u implementua nga KOPF, si pjesë e angazhimit për një komunitet më të shëndetshëm dhe të informuar ✅.

28/08/2025

Njoftim!

Në përputhje me Ligjin nr. 08/L-200 për Parandalimin dhe Kontrollin e Sëmundjeve Ngjitëse, Udhëzimin Administrativ nr. 05/2025 për Imunoprofilaksë dhe Kimoprofilaksë, Udhëzimin Administrativ (MASHTI) nr. 09/2023 për Regjistrimin e Fëmijëve në klasën e parë, Udhëzimin Administrativ (MASHTI) nr. 03/2022 për Përfshirjen e Fëmijëve në Institucione Parashkollore në Kosovë, si dhe Qarkoren Informative të Ministrisë së Shëndetësisë nr. 05/2025, njoftojmë se:

Fëmijët që regjistrohen në çerdhe, kopshte dhe shkolla fillore duhet të pajisen me dëshmi të vaksinimit, që tregon se janë vaksinuar sipas moshës në momentin e regjistrimit.

Kjo masë ka për qëllim mbrojtjen e shëndetit të fëmijëve dhe të gjithë komunitetit shkollor, duke parandaluar përhapjen e sëmundjeve ngjitëse dhe duke siguruar një mjedis të sigurt arsimor dhe edukativ për të gjithë.

Prindërit që kanë pyetje apo nevojë për sqarime, mund të kontaktojnë Qendrën e Mjekësisë Familjare më të afërt për ndihmë dhe këshillim të mëtejshëm.

Mbrojtja e shëndetit të fëmijëve është përgjegjësi e përbashkët për të gjithë ne!

02/08/2025

01/08/2025

24/07/2025

30/06/2025

Ligjëratë e veçantë në QKMF Shtime nga mjeku shqiptar që punon në Gjermani

📍Sot me datë 30.06.2025 salla e trajnimeve në Qendrën Kryesore të Mjekësisë Familjare “Dr.Vezir Bajrami” në Shtime u mbush me profesionistë shëndetësorë të interesuar për të ndjekur një ligjëratë me rëndësi të veçantë, mbajtur nga një figurë tashmë e dëshmuar në diasporë – mjeku shqiptar që aktualisht punon dhe vepron në Gjermani, dhe që dikur ishte pjesë e vetë QKMF-së sonë Dr. Metush Qorrolli.

⭕️ Tema “Kur ilaçi bëhet armik: Përdorimi i kujdesshëm i barnave kundër dhimbjes” solli në vëmendje sfidat gjithnjë e më të mëdha të përdorimit pa kriter të barnave analgjetike, me theks të veçantë mbi pasojat afatgjata të përdorimit të tyre pa mbikëqyrje mjekësore.

⭕️ Dr. Metushi ndau përvojën e tij të gjerë nga praktika në sistemin gjerman të kujdesit shëndetësor, duke theksuar rëndësinë e edukimit të pacientëve dhe rolit të profesionistëve shëndetësorë në parandalimin e varësisë, efekteve anësore, dhe dëmtimeve të mundshme nga barnat që shpesh përdoren si “zgjidhje e shpejtë” për dhimbjen.

⭕️ Pjesëmarrësit patën mundësinë të diskutojnë raste konkrete, të shtrojnë pyetje dhe të thellojnë njohuritë në këtë fushë kaq të rëndësishme të praktikës së përditshme mjekësore. Njëkohësisht, u theksua nevoja për përmirësimin e protokolleve vendore për përshkrimin dhe ndjekjen e trajtimeve me barna kundër dhimbjes.

⭕️ Ky aktivitet ishte një rikthim simbolik i vlerave dhe përvojës nga diaspora në vendlindje, duke dëshmuar se lidhja profesionale dhe emocionale me institucionet tona shëndetësore mbetet e fortë dhe frymëzuese.

👏 QKMF “Dr. Vezir Bajrami” në Shtime shpreh mirënjohje dhe falënderim ndaj mjekut Dr. Metush Qorrolli për gatishmërinë dhe përkushtimin e treguar, si dhe të gjithë pjesëmarrësit për angazhimin dhe diskutimet konstruktive.

19/06/2025

Darka e përvitshme për nder të 26-vjetorit Ditës së Hapjes së QKMF-së

🔘 Qendra Kryesore e Mjekësisë Familjare “Dr. Vezir Bajrami” në Shtime organizoi darkën e përvitshme tradicionale me rastin e 26-vjetorit Ditës së Hapjes së QKMF-së. Ky aktivitet tashmë është bërë pjesë e rëndësishme e kalendarit institucional, duke u shndërruar në një moment reflektimi mbi rrugëtimin e përbashkët, falënderimi për kontributin e secilit punëtor shëndetësor, si dhe nderimi për ata që me përkushtim kanë lënë gjurmë në historinë e shëndetësisë lokale.

🔘 Ceremonia festive, e organizuar në një ambient të ngrohtë dhe miqësor, mblodhi bashkë stafin aktual të QKMF-së, përfaqësues të institucioneve dhe mbi të gjitha, mjekët veteranë të Shtimes, të cilët kanë kontribuar me dekada në ngritjen dhe zhvillimin e shërbimeve shëndetësore në komunën tonë. Prania e tyre i dha kësaj darke një peshë të veçantë historike dhe emocionale, si një kujtesë për rrënjët mbi të cilat është ndërtuar ky institucion.

🔘 Në fjalën e tij përshëndetëse, drejtori i QKMF-së Dr. Ilaz Kadrijaj, theksoi rëndësinë e bashkëpunimit, përkushtimit dhe profesionalizmit të të gjithë stafit ndër vite, duke theksuar se suksesi i institucionit nuk do të ishte i mundur pa punën e palodhur të punonjësve shëndetësor.
“QKMF-Shtime është më shumë se një institucion – është një histori kolektive përkushtimi ndaj jetës dhe shëndetit të qytetarëve tanë,” u shpreh ai.
Kryetari i komunës së Shtimës Qemajl Aliu tha: “Është kënaqësi e veçantë të jem sonte në mesin tuaj, duke vlerësuar punën dhe përkushtimin që tregoni çdo ditë për shëndetin e qytetarëve tanë.”
Ndërsa drejtoresha e Shëndetësisë dhe Mirëqenies Sociale Mimoza Salihu në fjalën e saj përshëndetëse tha:“Falë përkushtimit tuaj dhe bashkëpunimit të ndërsjellë, jemi bërë shembull i një ekipi që punon me zemër për të mirën e popullatës.”

🔘 Një nga momentet më të veçanta të mbrëmjes ishte shpallja e “Punëtorit të Vitit”, një çmim që ndahet për të vlerësuar profesionalizmin, etikën, angazhimin dhe ndihmën e çmuar që një punëtor shëndetësor ka dhënë gjatë vitit kalendarik. Këtë vit, ky vlerësim i merituar shkoi për Mr. Ph. Naim Dauti i cili përfaqëson shembullin e një profesionisti që punon me zemër e përkushtim në shërbim të pacientit.

🔘 Po ashtu në këtë darkë u vlerësua lartë kontributi i mjekëve veteran në ndërtimin e themeleve të sistemit shëndetësor në komunën e Shtimes. Në emër të institucionit, u theksua se rruga që kemi përpara është e mbështetur në themele të forta që janë ndërtuar nga brezat paraardhës.

🔘 Qendra Kryesore e Mjekësisë Familjare “ Dr. Vezir Bajrami” në Shtime mbetet e përkushtuar në rrugën e profesionalizmit, humanizmit dhe zhvillimit të kapaciteteve për të ofruar shërbime shëndetësore të dinjitetshme dhe të qëndrueshme. Me këtë frymë, vazhdojmë përpara, të bashkuar dhe të përkushtuar, në shërbim të shëndetit të popullatës sonë.

03/06/2025

Pensionohet Punëtori i Shërbimit Teknik në QKMF

Në ambientet e Qendrës Kryesore të Mjekësisë Familjare “Dr. Vezir Bajrami” në Shtime, sot u organizua një koktej përshëndetës me rastin e pensionimit të punëtorit të shërbimit teknik, Isuf Sadiku.

Ky koktej u organizua nga menaxhmenti i QKMF-së për të nderuar dhe falënderuar punëtorin Isuf Sadikun për kontributin e tij shumëvjeçar dhe të palodhshëm në mirëmbajtjen dhe funksionimin e përditshëm të institucionit.

Në këtë aktivitet morën pjesë edhe Kryetari i Komunës së Shtimes, Qemajl Aliu, si dhe Drejtoresha e Drejtorisë së Shëndetësisë dhe Mirëqenies Sociale Mimoza Salihu, të cilët përshëndetën të pranishmit dhe vlerësuan lart përkushtimin dhe punën e çmuar të Isuf Sadikut.

Drejtori i QKMF-së, Dr. Ilaz Kadrijaj, me anë të një letre falenderimi, vlerësoi lart përkushtimin, përvojën dhe profesionalizmin që ka dëshmuar gjatë gjithë viteve të punës, duke kontribuar ndjeshëm në krijimin e një ambienti të sigurt dhe mikpritës për pacientët dhe stafin shëndetësor.

Në një atmosferë miqësore dhe të ngrohtë, stafi i QKMF-së i uroi shëndet, lumturi dhe suksese në fazën e re të jetës pas pensionimit, duke shprehur mirënjohje për të gjithë punën e bërë ndër vite.

Stafi menaxherial shpreh falenderimet më të përzemërta për angazhimin dhe dedikimin e treguar gjatë gjithë karrierës së tij në QKMF “Dr. Vezir Bajrami”

Ju urojmë pensionim të mbarë dhe të lumtur!

02/06/2025

“Administrimi i barnave” ishte ligjërata e radhës në kuadët të ZHVP-së

📍Sot me datë 02.06.2025 në kuadër të Zhvillimit të Vazhdueshëm Profesional (ZHVP), në sallën e trajnimeve të Qendrës Kryesore të Mjekësisë Familjare “Dr. Vezir Bajrami” në Shtime, u mbajt ligjërata me temën: Administrimi i Barnave.

⭕️ Ligjërata u mbajt nga inf. Dashurije Rush*ti, e cili ndau njohuritë dhe përvojën profesionale mbi:

🔹 Rëndësinë e administrimit korrekt të barnave për sigurinë e pacientit.
🔹 Përgatitjen dhe shpërndarjen e barnave në përputhje me protokollet mjekësore.
🔹 Dokumentimin e saktë dhe përgjegjësinë profesionale në administrimin e barnave.
🔹 Identifikimin dhe menaxhimin e efekteve të padëshiruara të barnave.

⭕️ Pjesëmarrësit patën mundësinë të kontribuojnë me pyetje, të ndajnë përvoja dhe të diskutojnë sfidat praktike në administrimin e barnave në nivel primar shëndetësor.

⭕️ Ligjërata u vlerësua si një mundësi e mirë për të fuqizuar njohuritë dhe kompetencat profesionale të stafit shëndetësor.

⭕️ Këto ligjerata janë të akredituara nga OIK-u dhe pikët e fituar do të ju shërbejnë të gjithë pjesëmarrësve për rilicencimin.

⭕️ Ky aktivitet është pjesë e angazhimit të QKMF “Dr. Vezir Bajrami” për të përmirësuar vazhdimisht cilësinë e shërbimeve dhe për të mbështetur zhvillimin profesional të stafit shëndetësor.

30/05/2025

Aktivitet Sensibilizues në Ambientet e QKMF-së për Ditën Botërore Pa Duhan

📍Me rastin e shënimit të Ditës Botërore Pa Duhan, Qendra Kryesore e Mjekësisë Familjare Dr. Vezir Bajrami në Shtime organizoi një aktivitet të veçantë sensibilizues në oborrin e institucionit, duke sjellë bashkë profesionistë shëndetësorë dhe qytetarë, për të promovuar jetesën pa duhan.

🏥 Që në orët e para të mëngjesit, oborri i QKMF-së u mbush me aktivitete të ndryshme dhe me pjesëmarrës të interesuar për të marrë informacion dhe mbështetje lidhur me lënien e duhanit.

🚭 Aktiviteti u hap me një fjalim të drejtorit dhe kryeinfermieres, të cili theksuan rëndësinë e ndërgjegjësimit mbi dëmet që shkakton duhani. Ata falënderuan të gjithë pjesëmarrësit dhe ekipin organizator për angazhimin dhe përkushtimin ndaj shëndetit publik.

Çfarë shkakton duhani? 🚭

Pirja e duhanit është një nga faktorët më të mëdhenj të rrezikut për shëndetin e njeriut. Ai shkakton dëme të mëdha në trup dhe ndikon negativisht në shumë organe. Ja disa nga problemet kryesore që shkakton duhani:

💔 Sëmundje të zemrës dhe enëve të gjakut
🫁 Sëmundje të mushkërive
😷 Kancer në organe të ndryshme
👶 Rrezik për gratë shtatzëna dhe fëmijët
🦷 Probleme me gojën dhe dhëmbët
🧑‍⚕️ Dëmtime të tjera në trup

🚭 Një kënd i posaçëm këshillimi u vendos për qytetarët që dëshironin të merrnin ndihmë të drejtpërdrejtë për lënien e duhanit. Profesionistët shëndetësor ishin në dispozicion për të ndarë materiale edukative, broshura, rekuizita dhe këshilla praktike për dëmet që shkakton duhani si dhe për dobitë e lënjes së duhanit.

🚭 Aktiviteti përfundoi me një falënderim të veçantë për të gjithë pjesëmarrësit, si dhe një rikujtim që QKMF mbetet gjithmonë e hapur për të ofruar mbështetje për të gjithë qytetarët që dëshirojnë të ndërmarrin hapa drejt një jete më të shëndetshme.

🚭 Ky aktivitet i përkushtuar dëshmon edhe një herë rolin e rëndësishëm të QKMF-së në promovimin e shëndetit publik dhe mirëqenies së komunitetit tonë.

Jetojmë më shëndetshëm – Bashkë për një të ardhme pa duhan! 🚭

28/05/2025

Përfunduan me sukses vizitat sistematike për fëmijët parashkollorë dhe klasat e para

📍Në kuadër të aktiviteteve të rregullta të kujdesit parandalues dhe promovues për shëndetin e fëmijëve, Qendra Kryesore e Mjekësisë Familjare me vizitat në fshatrat Lagje e Pajtimit, Davidoc dhe Kopshtin Hapat e Vegjël, ka përmbyllur me sukses ciklin e vizitave sistematike për fëmijët e grupmoshave parashkollore dhe për nxënësit e klasave të para.

👨‍⚕️ Ekipa shëndetësore sot ishte e përbërë nga Dr. Veton Gashi, inf. Vjollca Salihu, inf. Suzana Qorrolli dhe inf. Shehrije Asllani.

⭕️ Qëllimi kryesor i këtyre vizitave ka qenë përkujdesja e hershme dhe parandaluese, me fokus të veçantë në zbulimin e hershëm të problemeve shëndetësore dhe në ndihmën për zhvillimin e shëndetshëm të fëmijëve.

Gjatë vizitave janë realizuar:
• Kontroll mjekësor i përgjithshëm (matja e peshës, gjatësisë, ritmit të zemrës);
• Vlerësimi i shikimit dhe dëgjimit;
• Vlerësimi i zhvillimit psikomotor;
• Kontrolli i shëndetit oral dhe këshillime për higjienën e dhëmbëve;
• Këshillime të përgjithshme për ushqyerjen e shëndetshme dhe stilin e jetesës aktive.

⭕️ Vizitat janë realizuar nga ekipet e përkushtuara të profesionistëve shëndetësorë të QKMF-së, të cilët kanë treguar përkushtim të lartë dhe profesionalizëm gjatë gjithë procesit.

⭕️ Pjesëmarrja e fëmijëve ka qenë e kënaqshme, dhe bashkëpunimi me edukatoret, mësimdhënësit dhe prindërit ka qenë një faktor kyç në mbarëvajtjen e këtij aktiviteti.

⭕️ Në disa raste, janë ofruar këshilla individuale për prindërit lidhur me nevoja specifike të fëmijëve të tyre.

⭕️ Janë evidentuar edhe raste të cilat kanë pasur nevojë për ndjekje të mëtejme ose referim te specialistët për ekzaminime shtesë. Kjo tregon rëndësinë e këtyre vizitave, jo vetëm si një proces formal, por si një mjet i fuqishëm për të ndikuar pozitivisht në shëndetin e fëmijëve që në moshat më të hershme.

🏥 QKMF ”Dr. Vezir Bajrami” falënderon të gjitha institucionet arsimore për bashkëpunimin e vazhdueshëm, si dhe prindërit për mirëkuptimin dhe gatishmërinë për të qenë pjesë e këtij procesi.

👏 Një falënderim i veçantë u shkon ekipeve mjekësore që dhanë kontributin e tyre me përkushtim të plotë në këtë iniciativë të rëndësishme për popullatën.

⭕️ Ky aktivitet është dëshmi e përkushtimit tonë për të ofruar një kujdes cilësor, gjithëpërfshirës dhe të orientuar drejt parandalimit, duke kontribuar kështu në rritjen dhe zhvillimin e shëndetshëm të fëmijëve tanë.

⭕️ Qendra Kryesore e Mjekësisë Familjare “Dr. Vezir Bajrami” do të vazhdojë të jetë aktive në organizimin e shërbimeve të tilla parësore, me synimin që asnjë fëmijë të mos mbetet pa përkujdesjen e nevojshme shëndetësore në kohën e duhur.