01/11/2025
ສປປ ລາວ ພົບຄົນເຈັບດື້ຢາຕ້ານເຊື້ອຢູ່ເລື້ອຍໆ ຢ່າງໜ້າເປັນຫ່ວງ
ການຊື້ຢາມາກິນເອງ ກິນຢາຕ້ານເຊື້ອເກີນຄວາມຈຳເປັນ ແລະ ບໍ່ຖືກວິທີ ເຮັດໃຫ້ປັດຈຸບັນ ສປປ ລາວ ມີການກວດພົບຄົນເຈັບຕິດເຊື້ອດື້ຕໍ່ຢາຕ້ານເຊື້ອຢູ່ເລື້ອຍໆ ຫົວໜ້າພະແນກລະບົບປະສາດ ໂຮງໝໍສູນກາງ 103 ກອງທັບ ກ່າວ.
ທ່ານ ດຣ. ຄອນທະສຸກ ໄຊຍະວັນສີ ຫົວໜ້າພະແນກລະບົບປະສາດ, ໂຮງໝໍສູນກາງ 103 ກອງທັບ ໃຫ້ສຳພາດ ຕໍ່ Lao Youth Radio ກ່ຽວສະຖານະການຂອງການດື້ຢາຕ້ານເຊື້ອ (Antimicrobial Resistance - AMR) ໃນ ສປປ ລາວ ວ່າ: ປັດຈຸບັນການຕິດເຊື້ອດື້ຕໍ່ຢາຕ້ານເຊື້ອແມ່ນເປັນບັນຫາທີ່ໜ້າກັງວົນ, ປະຊາຊົນລາວສ່ວນຫຼາຍຖ້າເຈັບເປັນບໍ່ສະບາຍ ມັກຊື້ຢາມາກິນເອງ ກິນຢາຕ້ານເຊື້ອຢ່າງບໍ່ສົມເຫດສົມຜົນ ເກີນຄວາມຈຳເປັນ ແລະ ກິນບໍ່ຖືກວິທີ ຍ້ອນປະເທດເຮົາຢາຕ້ານເຊື້ອຊອກຊື້ງ່າຍຕາມຮ້ານຂາຍຢາທົ່ວໄປ ບໍ່ມີໃບສັ່ງຈາກແພດໝໍກໍສາມາດຊື້ກິນເອງໄດ້ ເຮັດໃຫ້ປັດຈຸບັນ ກວດພົບຄົນເຈັບຕິດເຊື້ອດື້ຕໍ່ຢາຕ້ານເຊື້ອຢູ່ເລື້ອຍໆ.
ທັງນີ້, ເຊື້ອແບັກທີເຣັຍທີ່ມີການດື້ຢາຫຼາຍທີ່ສຸດແມ່ນ Staphylococcus aureus (MRSA) ແລະ ພະຍາດຕິດເຊື່ອທີ່ມີບັນຫາການດື້ຢາແມ່ນບາດແຜເບົາຫວານ, ອັກເສບຫຼັງຜ່າຕັດ, ເຍື່ອຫຸ່ມສະໝອງອັກເສບ, ໄຂ່ຫຼັງອັກເສບເປັນໝອງ ແລະ ອື່ນໆ. ໃນຂະນະທີ່ການດື້ຢາຕ້ານເຊື້ອ ເກີດຈາກການໃຊ້ຢາຕ້ານເຊື້ອແບດທີເຣຍບໍ່ສົມເຫດສົມຜົນ ຊື້ຢາຕ້ານເຊື້ອກິນເອງເກີນຄວາມຈຳເປັນ, ກິນບໍ່ຖືກວິທີ ເຮັດໃຫ້ເຊື້ອພະຍາດດື້ຕໍ່ຢາ ແລະ ຄົນເຈັບບາງສ່ວນຍັງຕິດເຊື້ອດື້ຢາໃນໂຮງໝໍ.
ຫົວໜ້າພະແນກລະບົບປະສາດ ໃຫ້ຮູ້ອີກວ່າ: ປະຊາຊົນລາວສ່ວນຫຼາຍ ມັກງ່າຍ ເວລາເຈັບໄຂ້ບໍ່ມັກໄປກວດໂຮງໝໍ, ມັກໄປຊື້ຢາຕ້ານເຊື້ອມາກິນເອງ ເກີນຄວາມຈຳເປັນ, ຊື້ຢາຕາມຄວາມລຶ້ງເຄີຍ, ບາງກໍລະນີກິນໂດຍບໍ່ຖືກຂະຫນາດຢາ, ເມື່ອຮູ້ສືກວ່າດີຂຶ້ນແລ້ວເຊົາກິນທັນທີ ໂດຍບໍ່ຄົບຕາມກຳນົດວັນ, ພຶດຕິກຳແບ່ງຢາກັນກິນ, ກິນບໍ່ຖືກວິທີໂດຍບໍ່ຄຳນຶງເຖິງພາວະເຊື້ອດື້ຢາ ແລະ ຮ້ານຂາຍຢາສ່ວນຫຼາຍແມ່ນຂາຍຢາ ແລະ ວາງຢາຕ້ານເຊື້ອໃຫ້ຄົນເຈັບໂດຍທີ່ ບໍ່ມີໃບສັ່ງຈາກແພດ, ຂາຍຢາຕ້ານເຊື້ອບໍ່ຖືກກັບເຊື້ອພະຍາດຂອງຄົນເຈັບ, ຄົນເຈັບບາງຈຳນວນແມ່ນສັ່ງຊື້ຢາຕ້ານເຊື້ອມາຮັກສາເອງຕາມຄວາມຊິນເຄີຍ ຍ້ອນຊື້ງ່າຍ-ຂາຍງ່າຍ ສະດວກໃຫ້ຜູ້ຂາຍ ສະບາຍໃຫ້ຜູ້ຊື້ ເຊິ່ງເປັນບັນຫາການຕິດເຊື້ອດື້ຢາໃນ ສປປ ລາວ ປັດຈຸບັນ.
ສ່ວນກ່ຽວກັບການປ້ອງກັນ ແລະ ແກ້ໄຂ: ໂຮງຫມໍ ແມ່ນມີນະໂຍບາຍກະກຽມແຕ່ງຕັ້ງຄະນະກຳມະການຄອບຄຸມການຕິດເຊື້ອໃນໂຮງໝໍ ແລະ ແຕ່ງໜ່ວຍງານຄອບຄຸມການຕິດເຊື້ອໃນແຕ່ລະພະແນກ, ແຕ່ລະພະແນກມີຫ້ອງແຍກສຳລັບຄົນເຈັບຕິດເຊື້ອດື້ຢາ, ມີອຸປະກອນເຄື່ອງໃຊ້ອົບຂ້າເຊື້ອ ແລະ ປ້ອງກັນການຕິດເຊື້ອຢູ່ແຕ່ລະພະແນກ, ຈັດກອງປະຊຸມຢ່າງຕໍ່ເນື່ອງກ່ຽວກັບການຄວບຄຸມ ແລະ ປ້ອງກັນການຕິດເຊື້ອດື້ຢາ AMR ໃຫ້ແກ່ ບຸກຄະລາກອນທາງການແພດ, ການນຳໃຊ້ຢາຂອງແຕ່ລະພະແນກ ທ່ານໝໍໄດ້ມີການກວດກາ, ສອບຖາມປະຫວັດ, ສັ່ງກວດ ເເລະ ບົ່ງມະຕິພະຍາດຊັດເຈນ ເພື່ອໃຊ້ຢາໃຫ້ເໝາະສົມກັບພະຍາດນັ້ນ. ນອກຈາກນີ້ຍັງໃຫ້ມີການສຸຂະສຶກສາການໃນໃຊ້ຢາຕ້ານເຊື້ອໃຫ້ຖືກວິທີ ແລະ ສົມເຫດສົມຜົນໃຫ້ແກ່ຄົນເຈັບທີ່ມາໃຊ້ບໍລິການ. ມີການເຝົ້າລະວັງ (surveillance) ການດື້ຢາຢ່າງເປັນລະບົບເວລາພົບ ກໍລະນີດື້ຢາໃດໜຶ່ງ ຕໍ່ພະແນກໃດໜຶ່ງ ຈະຕ້ອງລາຍງານເຖິງໝ່ວຍງານຮັບຜິດຊອບການຄວບຄຸມການຕິດເຊື້ອໃຫ້ຮັບຮູ້, ແຍກຄົນເຈັບໃຫ້ຢູ່ຫ້ອງແຍກດ່ຽວສຳຫລັບຄົນເຈັບຕິດເຊື້ອດື້ຢາ ເພື່ອປ້ອງກັນການແຜ່ເຊື້ອ.
ພ້ອມດຽວກັນ, ທ່ານ ດຣ. ຄອນທະສຸກ ໄຊຍະວັນສີ ຫົວໜ້າພະແນກລະບົບປະສາດ, ໂຮງໝໍສູນກາງ 103 ກອງທັບ ໄດ້ມີຄຳແນະນໍາຝາກເຖິງພໍ່ແມ່ປະຊາຊົນ ເພື່ອຫລຸດຜ່ອນການຕິດເຊື້ອດື້ຕໍ່ຢາຕ້ານເຊື້ອ ຄວນມີການສຸຂະສຶກສາໃຫ້ປະຊາຊົນເວລາເຈັບເປັນບໍ່ສະບາຍ ບໍ່ໃຫ້ຊື້ຢາຕ້ານເຊື້ອມາກິນເອງ, ໃຫ້ໄປກວດຢູ່ສະຖານທີ່ກວດສຸພະພາບ ແລະ ກິນຢາໃຫ້ຖືກວິທີ ຖືກຂະໜາດ ແລະ ຄົບຕາມກຳນົດເວລາ. ສຸຂະສຶກສາ ໃຫ້ປະຊາຊົນຮູ້ເຖິງຜົນຕາມມາຂອງການໃຊ້ຢາຕ້ານເຊື້ອທີ່ບໍ່ຖືກຕ້ອງ ເຮັດໃຫ້ເກີດເຊື້ອດື້ຢາ ເຮັດໃຫ້ຍາກໃນການປີ່ນປົວໃຫ້ຫາຍດີໃນຄັ້ງຕໍ່ໄປ.
ນອກຈາກນີ້, ທ່ານຍັງກ່າວເຖິງອຸປະສັກ ແລະ ສິ່ງທ້າທາຍໃນການຈັດການກັບການດື້ຢາ ເມື່ອການພົບເຊື່ອດື້ຢາແມ່ນອີງໃສ່ການປູກເພາະເຊື້ອ ເຊິ່ງໃຊ້ເວລາຫຼາຍວັນເຊື້ອຈຶ່ງເກີດ ເມື່ອຮູ້ວ່າຄົນເຈັບຕຶດເຊື້ອດື້ຢາແມ່ນຄົນເຈັບນອນຫ້ອງລວມກັບຄົນເຈັບຫຼາຍຄົນແລ້ວ ເຊິ່ງມາແຍກຫ້ອງຄົນເຈັບທີ່ຫຼັງ, ຂາດແຄນຊັບພະຍາກອນຄື ຂາດບຸກຄະລາກອນແພດໝໍ, ພະຍາບານ ແລະ ຜູ້ໃຫ້ຂໍ້ມູນທີ່ຖືກຕ້ອງ ຢ່າງເຂັ່ມງວດ ແລະ ສະເໜີລັດຖະບານ, ອົງການຈັດຕັ້ງສາກົນ ສະໜັບສະໜູນເຊັ່ນ: ສະໝອງອຸປະກອນການແພດໃຫ້ຄົບຖ້ວນ ແລະ ທົ່ວເຖິງ, ທຶນ ແລະ ງົບປະມານໃນການສົ່ງເສີມ, ພ້ອມສະຫວັດດີການຕ່າງໆ ເພື່ອອຳນວຍຄວາມສະດວກໃຫ້ກັບແພດໝໍ.
