心瀝療舍 • Healing SOULxiety - 藝術治療及心靈健康 • Art Therapy & Sustainable Well-being (2026)

14/10/2025

我與「畢加索：縱情尋美」

感覺開左學好似好耐
但原來只係10月中 (都只係個半月?!)
大概因為跑學校的日子又開始
感覺時間過得快左
繼續同各位學子一齊努力...跑~!

講起跑
早前我都趁有空間去澳門跑左趟
主要係為左睇藝術展，
好讓自己於工作上、專業上、個人成長上三管齊下地
滋養一下自己過去半年工作的精神心力付出。

無錯!去澳門唔一定只係賭!

呢個畢加索的展覽座落氹仔一間酒店的商場內
地理感覺幾親民
場地亦似乎一早已規劃作展覽/活動用途
因此場內空間唔少，樓底空間足夠
做畫展個人覺得無違和感。

當年乃活躍歐洲時
到過唔少地方看畢加索的作品
相比之下
今次「畢加索：縱情尋美」的重點
多落在呢位大師的愛情/家庭生活小品中
以展出大量手稿為主
同時加入唔少西班牙地方色彩/故事去襯托大師的個人與藝術成長
所以呢個展覽其實係好岩入門級的觀眾作起點去認識呢位大師
而對我呢類粉絲級觀眾黎講亦係耳目一新
因為成個策展/說故事的方式好真實，好貼地
可以話係以 back to basic/behind the scene的方式
去看到呢位藝術大師更生活化的一面。

手稿係大畫布作品的第一步
好多時候看手稿的一筆一線
反而看到更多藝術家內在最無遺的激情與心跳!
展中眾多稿作中
相中一系列的呢三張
令我印象最深刻!

描繪的係大師的愛人之一
三張相同的人物
但好唔同的形態表現
最感染我係每一張都充滿住不斷來回的筆觸
而當中每一線條
都充滿力量

呢種力量/情緒/激情
當透過所畫的線條去表現
對於藝術治療的臨床應用上係重要的元素
因為當情緒能量推動行為
而行為表現能透過視覺呈現時
會有 "Seeing is Knowing" 的作用
會係一個有效的工具去感知自身/畫者當刻的狀態

大家可以試試想像
呢三幅畫稿為三張不同心情狀態的心電圖
再去幻想一下畢先生畫的當時
對呢位愛人的內心感受係如何... ...
尤其他對眼睛與其凝視狀態的描繪，也讓我凝視得入神。

同場，展覽亦有藝術感知活動
免費俾入場人仕參加。
小組治療/主持我就做得多
有機會做參與者我當然唔客氣咯~哈哈!

都係一個淺層輕鬆的see & feel & draw活動
透過看畫作去探索自己所被帶動的感受
同時感受自己的感受... ...

呢個就係做創作同觀看藝術
在自然界的人性中
最重要的存在價值。

#縱情尋美 #畢加索 #藝術治療

02/09/2025

早前趁學生放暑假
我都趁此時間整頓自己的生活方向
日子好快又黎到 9月~

做得學生/青少年服務多
心態上都多左跟佢地個 school calendar 運行
所以呢個月份對我黎講都係一個開始/重設。

週末時做左個 CDC Training
係一個我俾自己的"開學禮"。
Notes上/導師口中的知識、理論、建議等
都只係引子/切入點去幫我溫故而知新
更重要係透過學習的過程
再一次對自己的提醒
要保持不斷學習的心態之餘
都要繼續以清晰的思覺去正視/質疑不同層面的偏頗或先入為主
當中包括:
性別
年齡
國藉
宗教
文化
家庭/社會階層。。。

其實每一個元素都有值得反思同互相影響的地方
總唔能夠就住一點而去一概而論
尤其過去都多照顧少數族裔/非華語學生
甚至要同佢地一同思考宗教對佢地的意義
因此更睇到思維彈性同保持好奇心
對心理治療同心理教育工作的重要性

新一個學年
不論係學生與否
都祝願每一位
不論於任何年齡或文化背景下
都能以開放的心態及不同形式的學習
去享受自身內在的成長路途
繼續每年都"開學"!! :D

而作為治療師的我
都會繼續享受我 "專業成長"的路途! (pathway of professional growth)

03/07/2025

日子黎到 7月
除左繼續努力寫reportssss外
亦進入左一輪機關槍式的入校試後programme:
生涯規劃 workshop, talk, lecture...
而完成工作後
我通常會於"當地就醫"。。。(個肚)
平時好少食All Day Breakfast
因為未必每樣都喜歡食
唔想勉強食或浪費
但相中呢個"Norway ADB"我第一次encore!
我欣賞佢真係有菜有魚有肉又有果
有crispy 亦有mushy (早上我有口腔感統需要~哈) :D
雖然碟中的確唔係每一樣都絶對健康
但就係喜歡佢樣樣有D
亦合我胃口!
做心理治療呢份工作
尤其今年
個腦真係用得太多太盡
開始多左留意自己日常的 energy in & out
發現要持久飽肚兼有氣力
炭水食物其實唔洗太多
而係要由多種不同食物中取不同營養
其實好多時見學生
都會問佢地平日進食習慣/喜好
都發現佢地營養攝取的概念同意識好唔足夠
只要無人管
一係唔食
一係就食化學野
(只要唔洗開工，我假期都會輕食，但工作日子就一定唔會！) :P
因為大腦會用上我地整體能量的20%
所以尤其是對 SEN 黎講
身體拎唔足營養
個腦係會用行為同精神狀態
去投訴身體的主人:
情緒會易跳動
決策會差左
上堂專注度低
書即使有聽都唔入腦
呢個對ADHD人黎講特別明顯
(而ASD人就會冷眼旁白:就算我食得足足，只要我決定唔聽就唔聽~!) XD
所以想有好的學習狀態同工作效率
就要有足夠的燃料配搭
去撻著個腦!

23/06/2025

【自療自省生活篇系列】之 "兩件芋頭糕"!
「兩件芋頭吖~唔該!」
呢句說話係我同糕點姐姐每次見面的開場白
但除左呢句開場白同收錢等必需須的實際對話外
我地好少再會講其他野(我份人好少R水吹~哈)
如是者
呢句對白平均每星期會發生2-3次
亦維持左大約一年有多
但近日發現有點"唔同"
糕點姐姐開工雖然總會戴口罩
但佢同我一樣都係眼睛識笑的人
從佢近呢幾次多左出現的"眼仔笑笑的"
我FEEL到佢開始認得我。。。(?!)
今日又去買糕。
「兩件芋頭吖~唔該!」
「咦?今日咁早嘅?平時晏少少先見到你!」(又係眼仔笑笑的)
「吖?你開始認得我呀? 係呀，係附近做野，時間有時會唔同。」
(今次我都同佢一齊眼仔笑笑的)
由重複性的供求關係
進展到人性化多一點的互動
或者對大家黎講
都只係一件好平常同表面的事
但我今次反思同學習的著眼點
反而係引伸到臨床工作同日常信念上
如何去展現真正的自己同自己所守的原則:
當大家能以自己的信念模式去按常運行
「重複做/堅持做」自己相信而又擅長的事時
又能夠保持「用心做」的態度
再慢慢加入「變化同創意」從中成長
最終總能展示出清晰的個人定位
呢個或者就係作為*自己*
於做事原則上最好的對外傳達/表達
"Show don't Tell" 也許就係呢個意思~
呢個反思亦令我連繫到點解ASD人
於某些事情上能在表面不喧嘩之下
最終有令人讚嘆的表現:
表面上佢地只係「重複做」
但正因為佢地堅持「用心做」
我做治療師甚至家長需要提供的其實唔需要多
就係讓佢地有足夠空間
安全地感受「變化同創意」的正面力量
就好足夠了~
P.S.
上上段的「...」同 " ..." 內容
要特別鳴謝過去一星期
透過與督導同身邊的前輩互動
而獲得的大腦資源
唔止係視覺藝術的互動
其實透過日常有思考成份的說話互動
已經可以成為一個淺層的內在整理機會~!~
原來「重複」「用心」去買糕
係可以買出富「變化同創意」的內在智慧~!!
今日試埋班蘭糕! :P

09/06/2025

【香港非遺月 -- ASD+工作坊隨筆】
望望日子
對上一次出POST已經是整整5個月前的事~ ^^''
新年過後，下學期一開始，
就一直在忙入校的臨床工作。
3-5月間更有幾個小組同期進行中，
所以過去一季，
都不得不以direct service同休息為先。
工作還工作，
過去一季只要有時間空間
都會參與下校外或其他非臨床的工作
平衡一下腦袋同心靈。
稍後會再逐一補POST!
今個POST 的引子係「非遺月」
係，今年6月係第一屆「香港非遺月」，
以「香港處處有非遺」為主題。

Nicole 有幸經 HK Art School 的舊同學招手
參與6月1日於文化中心的非遺嘉年華，
協助當日「灰塑與彩繪」的體驗工作坊。
我本身對傳統文化藝術有興趣(話哂都係水墨之友!)
加上我覺得非遺文化係值得承傳同推廣的(再唔推就真係無架喇!)，
更重要係因今次工作，
在不知情下與HK Art School 的舊師兄相認!
當年稍稍認識後，失散多年後再重遇(笑)，
人的緣份真係好驚喜!
本身知道呢類俾公眾人士/全開放式的工作坊
其實並唔要求參加者的最終成品效果
而多係透過工作坊的過程
讓大家能夠觀察同接觸林師傅的灰塑彩繪作品
去了解「灰塑」技藝係咩一回事。
因此，對青少年同成年人，
我會盡量講解灰塑中彩繪的原理同技巧;
而小童如果未有任何相關繪畫工具的經驗，
我就只講解用法再讓他們自由發揮。
而咁岩，我遇著一位(後來先知有ASD的)仔仔同佢媽媽
兩位一開始同步進場，來個各畫一幅的親子體驗。
兩位一同聽完我的指導下就默默地畫，
媽媽約半小時已完成，嘗試等仔仔完成。
但見仔仔高度仔細加專注繪畫中，
係當日少數「兒童組」(甚至係「成年組」)中的大師級手藝，
而且佢亦唔怕污糟，筆帚同手一齊用落ACRYLIC，
我就估計我需要俾佢畫多陣…
工作坊係由帶位姐姐入場前粗略地講時限
然後以遊擊方式(看人龍長短)去處理…
媽媽等到由行開左一陣去到返番黎
呢位仔仔坐左差唔多成個鐘作品都未離到手
佢頗為執著細位完美度
不斷執、不斷補…
後來人龍加碼
我都唯有讓媽媽示意他要離開，
開頭仔仔頗有堅持(不動)，
後來終於帶住脾氣離座，
忍唔住回媽媽一句:你都係咁催我咯，我咪唔畫咯!唔畫喇!
(其實企係度拎住個畫板仲畫緊…^^'')
呢個時候媽媽先無奈地同我細細聲講:
"唉~ 佢係A仔黎，好固執!"
果一刻我就明哂仔仔點解會咁…
仔仔唔肯走，夾硬企左係BOOTH的前台邊畫，我明白媽媽的無奈
但因為無一個同步/明顯的視覺暗示
又無一個明確幾時一定要完成的指引
ASD孩子係好難去接受或明白幾時要停/要走
佢地身處呢類開放式場合其實係有挑戰的
最後，Nicole 唯有「姑娘」上身，
先講一句:我知道想畫靚同完美佢呀，但要拎住佢黎畫，其實有機會越加得多筆就越容易畫壞幅畫，不如見而家我都覺得好好，畫到呢度就停好嘛?
仔仔其實聽到又明白的，
但依然需要轉向與我同一陣線的媽媽為對象，
重複輸出要走的不滿:
"你又係咁催我，我走咯!唔畫喇!"
我唔想媽媽默默受靶，唯有示意媽媽先離開工作坊範圍，
讓她在欄河一隔之外，在仔仔目睹之下接過畫作，
我補一句:畫作未乾，我估你都唔想整花佢，我先交畫作俾媽媽係出面保管住，你而家先抺好手，咩番個背包，先出去接番張畫…
佢急急腳就咩左個背包，跟住抺手，
見ACRYLIC係佢手上都乾左就唔勉強佢抺，
跟住想跑出去果下媽媽叫住佢未除圍裙，
然後仔仔都係炆左咁亂扯件圍裙:"唔得呀!!除唔到呀!!!"
我俾過張新的濕紙巾佢，同佢講:
得~除到架~你再抺下手先，俾少少時間我幫你除。
佢至少企定定，等我解左佢頸後面個圍裙結。
我再補:OK啦~咪除到咯，出去揾媽媽啦~!
正直仔仔一溜煙咁跑出去揾媽媽之際，
媽媽於欄河外同我講左句:真係多謝哂姐姐你，對阿仔好有耐性同愛心!
我當刻先提及自己係藝術治療師，平時都多面對有SEN的學生，
亦明白孩子有ASD，做家長係唔容易的。
或者隨住對SEN 的認識同評估日漸普及
其實我自己當日亦無估計到平時入校處理SEN 的經驗與知識
於呢類公眾場合都會用上。
回想當時，可能多於係我藉由工作訓練的本能反應
同即時換位思考的結果。
又或者係，其實除左需要專業知識外，
更重要的，可能就係媽媽所講的多一點「耐性同愛心」!

10/01/2025

【身心關係 -- 身體作心靈工具】

自上個 9月開始
當各中學的入校服務再次"開學"
Nicole就一直忙碌地進出各大課室/禮堂/活動室
個心掛得 Direct service
就總要推後 Marketing work
所以媒體Post都慢慢變成季度性了 ^^''

說著於外在工作世界上的忙碌
其實更加要說的是
只要是用心做對人的工作/心理治療
其實真正的"工作"並不止於外在的工作時間
同時也是治療師內在不斷自我"版本更新"的時候

能把握此時機自我觀照
透過內在感受重點探索
於專題的內在自省、專業督導及進修下
重新發現身心靈的需要與洞見
其實就是心理治療師無論外在風雨多少
都 "Business as Usual"的日常
此"Business"越好
就代表治療師的臨床狀態與治療經驗躍進越大
有時呢份內在"Business"真係年中無休
的確都會用上不少精力和專注!
.

踏入2025年
終於可以趁學生放假/考試期間回一回氣
把專注放回"更新"自己內在及身邊的人
也趁有多一點點空間
用回自己的強項
以創意和圖像表達心意

圖中是一張手繪咭
話說收咭人早前跟我分享了一個兒時與自己身體的經驗
說兒時常跟隨父母外出辦事
有時手上沒有玩具但又感到納悶之時
就會不其然地把耳窩變成即時的解悶工具
以指尖沿著耳骨的輪廓滑下
幻想成是公園中的滑梯作樂

我個人並沒有這個與身體的互動經驗
所以起初聽到覺得很新奇和有創意(幻想與創意是兒童的神奇力量!)
因此把聖誕+"Happy撩耳牙"+耳朵滑梯
合成了這張"集大成"的節日小心意
後來對方真的向我表示喜歡撩耳仔的感覺, 哈~!

透過身體的某些特定部位與觸感
去令自己內心舒適是我們的本能之一

良性的
有輕觸身體作自我安慰
有對柔軟物質的反復撫摸
當然也包括以部位的形態作想像來自我娛樂一番

不太健康的
有對面上粉刺的不斷擠壓
有對身體某部位重複清洗
當然也包括以利器傷害自己身體

這些都是我們與自己身體的互動
不論是良性或是不太健康的
其實任何我們對待自己身體的方式與行為
都會帶出「我」的心理狀況
及我與自身的關係
透過這種「身與心」不可分割的親密關係下
透露出我們在自我價值上的定位

因此
各種對待身體的行徑
其實都承載住重要的心理訊息:
是自我迷戀?
是自愛自在?
或是自我厭惡?

以上三組形容只是屬於比較粗略概括的自我感覺定位點
自我感覺以至自我價值觀其實可以更複雜、矛盾和多向性
這也是為何藝術治療除了運用視覺外
亦會充分運用觸覺元素及物料使用的過程
去作情緒能量輸出及重要心理資訊的來源之一。

24/10/2024

踏入10 月
入校的藝術治療工作"又開學了"
不過適逢學生要預備測驗週
我又可趁這時間補一下活動回顧~

在這兩個月一邊恆常見個案
一邊努力"動筆"追進度下
終於補到 10 月份的活動了~YAY!!

10月入校的工作雖再次啟動
但都無阻各項活動的發生
因為都是有趣的項目!

繼9月初與《世界華商菁英會》x "Ah-Ha Museum of Art "
為他們的 "Art of Insight"作講座嘉賓後 (詳見前一貼文)
10月5日，Nicole 再次穫邀出動同一企劃的工作坊
除了動口，當然也要動手咯!

這個工作坊以「即興塗鴉」/ "Intuitive Art"為概念
去讓參加者以更自主及輕型的方式
去探索人類生命中最常出現
但又最難去靠近和窺探的兩大情緒狀態:
「忿怒」和「焦慮」

今次的活動對象是成年人
並以商界及專業人仕居多
雖然當中有部分人有藝術創作的習慣或經驗
但要一開始就開宗明義地透過以上兩組情緒字眼
去進行主題式的藝術創作及內在探索
其實對一般工作中的成年人來說並不輕易。。。

因此我這次特別著重創作前與過程之間的引線
就是說過程及想像的啟動
與流程上的延伸同樣重要
所以都特別在選取材料及考慮到心理流程上
好好構思

當日我選用了玩法較多亦涉及較多觸感的材料
並用上一些催眠治療常用的聲音技巧
助參加者更易進入貼合他們各自需要的內在狀態之中
與自身情緒連結

透過言語音調(聽覺)、物料示範(動態+視覺)、過程中的互動(心理動力)等效應
每個人最終也有很獨特的視覺表現方式
我們亦在創作完成後的分享過程中
探索這兩種情緒與自身的關係
尋找當中新的可能性

事後感：
雖說我的服務過去多以青少年為主
但我自己其實頗喜歡與成年參加者進行事後分享
一來我有機會講解一些更抽象或複雜的情緒知識和心靈智慧
這是因為成年人人生經驗較多
理解此事上普遍是較青少年輕易和更入腦的
而正因為此
我可以毫不吝嗇地講解更多藝術治療的作用
並以當刻工作坊的經驗和過程去作即時的實例連結
令整個理解過程更立體，更"Ah~Ha~"
(但計創作與實驗式玩樂，則青少年較揮灑自如，我也會樂在其中的！哈哈~)

這類工作坊雖有加入藝術治療技巧與元素
但因為目標和焦點並不在於要進行輔導或治療
所以對話的過程多重於情而非對事
這是主持或治療師都必需著點清晰
也是為何仍需要由已註冊的藝術治療師去執行
去保障所有參與者的心理安全：）

(工作坊當日點滴，請看相片簡述…^^)

11/10/2024

趁假期，又係時候補一下早前的活動回顧

9月4日-- "Art of Insight Series" 分享會

參與了《世界華商菁英會》以 "Ah Ha Museum"
於 PMQ 試行的計劃
藉著現代藝術史分享、作品導賞及創作體驗
帶出情緒健康及心理教育為目標的 EmotiArt Program.

之前一聽過內容和宗旨後我便極之有興趣參與
一來是作為 ART LOVER
本身對藝術所抱持的信仰與熱誠
二來是作為 ART PSYCHOTHERAPIST
對視覺藝術能療癒心靈的一份堅信與重視
而此企劃原本我只是被邀作參與/體驗者

幸得在藝術治療師的背景得以被介紹下
其後得到主辦單位邀請
擔任當中的分享者及帶領體驗工作坊
讓我可以以多個角度與身份
去與其他參與者接觸互動

當晚在茶香與美點伴隨下
我有機會以「都市人的空心症」這個題目
透過與主持對談及分享自己的小品式創作
解釋藝術治療於都市人心理狀況上的應用
帶出「感受可以透過藝術去表達，從而釋放，療癒」這訊息
身體力行地滲透到商界及專業人仕的生活角落
平衡日常以邏輯性思維偏重而抑制情緒的習慣。

結尾透過希臘神話人物作比喻
帶出活在都市當中的一些心靈智慧
讓大家帶多一點生活靈感
回到自己內在的「小都市」之中
為每一日生活中的規律與重複性
付予更大的意義與動力。

事後感：
仍然都係好鐘意做一d
帶有特定焦點或主題性重的藝術心理教育工作。
心理教育本身已可有好多不同玩法
每次都可以揮灑不同的創意同玩味
再加入埋藝術治療的理論去呈現
我可以以更闊但更貼地的比喻方式
去帶出重點同靈感
係設計上最好玩，最令我興奮的地方！

而當用黎帶出理論與重點的比喻/工具/舖排
用得出奇而恰當
最終能令大家為之點頭及
能不由自主從口中吐出一句 "Ah Ha~" 之時
亦都係我於這項工作上最有快感之時！：D

19/09/2024

好! 繼續早前未完成的 8月活動回顧~

8月25日--『全民抗壓日』

跟催眠治療師班的導師同 Buddies們再組義工團隊出動
與主辦單位 "WeLoveU Foundation" 合作
於九龍城廣場設即場心理咨詢攤位及芳療手作攤位活動

其實我是第一次身處人來人往的商場環境做服務
發現原來位處商場的活動攤位是會異常吸引人流和眼球的!
所以當日我都未有抽身去做太多心理咨詢的服務
只能全日輔助手作導師完成一輪接一輪的工作坊

經過全日的指導工作同大量社交互動後
離開商場時，真的感覺整個人"無電"了 ~!!🥴

事後感:
自從《心瀝療舍》開業後
我已經較少接只是純指導/技巧為主的視藝教學工作
都盡量想把心力用於如何以藝術創作達致心理治療的效果上

但今次義工活動讓我這個
可 "E" (extrovert) 但個底好 "I" (introvert) 的治療師
可以唔洗諗/分析咁多，
純粹學下整新野 (我係當日跟導師即學即教的!)
一邊輕鬆地與參加者互相笑笑療聊天

其實都是一種教者與學者同時+即時互動抒壓好方法!
雖然當日忙到無哂電+在相中都只能披頭散髮😂，
但見大家都好喜歡自己的作品
其實好有滿足感的
重拾了當年教畫畫時的滋味 ~哈!

17/09/2024

自7月正式忙完一年的學校工作後
8月就開始馬不停蹄地有不少非治療性質的對外工作
忙到連 POST 都未有時間出! 🥲
(但放心，會不日源源補上~哈!)
似乎暑假是時候要還番過去一個學年儲下的學術推廣任務~! 😎

先 LIST OUT 一下過去8-9月的戰績:
8月10日--『和治療師談離別』ZOOM
8月20-21日--『多元。感動。Omni inmO 教育體驗展』
8月25日--『全民抗壓日』
9月4日-- "Art of Insight Series" 分享會

分POST 逐個講~!😏

8月10日--『和治療師談離別』ZOOM
跟《希戲劇場》Miss Lily 首次合作--8月好爸媽繪本學堂
帶給爸爸媽媽如何透過視覺元素及繪本說故事的技巧
從而協助家長為子女帶出離別與哀傷情緒的處理方式和心法~!

我當日主要帶出
"悲傷五個階段 (The Five Stages of Grief)" 的內容
讓家長了解「離別」與「悲傷」這個情緒感受的關係和來源
認識當中不同階段下的心理需要

我亦同時分享了兩個處理離別與哀傷事件的藝術治療案例
進而讓家長明白視覺藝術與創作
如何幫助子女表達及釋放糾結情緒
協助家長了解子女的情緒需要
學會透過「表達」與「接納」
去處理人生中的離別與哀傷事件。

當日亦有家長即時分享和孩子面對家庭離異的情緒挑戰。
係另一個我好想有機會分享的專題！

事後感:
其實我幾喜歡聚焦於一些專題情緒
去帶出藝術治療的作用和好處

因為一個精準到肉的主題分享與內容設計
是勝過我搬出過往所讀過無數深奧透徹
但對大眾來說離地難明的心理治療理論~
所以於我來說是一件富挑戰性的任務
但卻十分值得花時間和心思去做好的心理教育工作!

(特別鳴謝 MISS LILY 當日的 ZOOM-SCREEN 圖! )

29/08/2024

由6月中後開始，
當學生們的Clinical Reports都尚未寫完
當學校Post-Exam 藝術治療小組都尚未完結
就開啟了Omni inmO 的第一個會議
經過僅僅兩個月(想要多一日都無!)的努力籌備旅程
整個活動於上星期也完滿順利地完成!

在此感謝8月20及21日當天能與你們相聚傾談的每一位
你們的到場、對藝術治療的好奇與興趣
甚至你們的體驗與故事分享
都令我感到這兩個月以來的用心和落力別具意義!
感謝~感謝!!

進入私人執業暨《心瀝療舍》開業的第三個年頭
我才真真正正第一次去認真地進行服務上的推廣
(過去頭兩年都在不斷增值自己的服務和公司運作，希望先讓自己和內部配置企穩陣腳)
不過由於心態與性格上都不是很愛 "SELL"
所以今次教育體驗展多是以「藝術治療代言人」或「心理教育者」的狀態展現
以親身面談、即場小體驗、講座、工作坊、分享會等形式
希望向更多人介紹藝術治療的用法與好處
讓大家明白保持情緒與精神健康的過程
其實是可以高度自主、自由
及於我們的內在可以有無限的可能性與空間!

稍後我會於不同日子
在這裡放上活動隨筆
回顧一下這兩天教育展中的一些心動點滴
與當日未能到場的你
分享一下 Nicole這次對外踏出另一大步的體驗與成果!

02/08/2024

8月份藝術治療免費推廣活動

📌 *多元。感動。Omni inmO 教育體驗展* 📌
*老師們、社福界同工們不容錯過*

AI時代，疫後年代，下一代面對更具挑戰的未來。如何面對挑戰，處理壓力，放鬆身心，平和成熟對待，更是教育界本身關注的問題，亦少不了治療師的參與和支持！

🧚🏻‍♀️由香港中文大學校友慈善基金贊助，得閒去飲茶10周年呈獻，七個夥伴機構聯合主辦，一共 2天 37場以 *正向及情緒健康為主題* 的體驗活動及講座，為你提供很好的點子。😎

🤩參加者有機會 *半價* ，甚至 *免費* 到校舉行活動，還有即場香薰精油純露調配體驗🪻，【點。心 Luncheon】Wellbeing分享會🥟。讓老師們準備好，一齊把滿滿元氣的身心靈體驗活動帶回校園給學生🏫
＝＝＝＝＝＝
*報名：*https://forms.gle/bEB6NqwSWLwfQNFz6

*活動日期：* 2024年8月20日 - 21日
*地點：* 大埔藝術中心
*活動場數：* 2天共37場
*活動贊助：* 香港中文大學校友慈善基金

＝＝＝＝＝＝＝＝＝＝＝＝＝＝＝＝
主辦機構介紹及活動，詳見報名表～
📌 *～活動絕對精彩，老師們、社福界同工們不容錯過～* 📌

心瀝療舍 • Healing SOULxiety - 藝術治療及心靈健康 • Art Therapy & Sustainable Well-being

14/10/2025

02/09/2025

03/07/2025

23/06/2025

09/06/2025

10/01/2025

24/10/2024

11/10/2024

19/09/2024

17/09/2024

29/08/2024

02/08/2024

Address

Telephone

Website

Alerts

Shortcuts

Share