31/12/2024
Net van my aan elkeen van julle wat in 2024 deel van my lewe was.
Ek skryf vanmôre vanuit my kantoor aan jou!
Hoe het 2024 vir jou gegaan? Ek moet sê die jaar het omgevlieg en as ek eerlik moet wees was hierdie ‘n uitdagende jaar.
Hoe voel jy oor 2025? Miskien kan ek die vraag meer intens vra: Hoe voel jy tans oor jou lewe en die rigting waarin jou lewe beweeg?
Op ‘n rype 56 jaar (en my lyf wat besig is om in skaniere wat kraak te verander) is daar deesdae by my hierdie droom dat in die jare wat die Here my lewe nog toevoeg ek meer as ooit ingestel gaan wees om meer en meer te groei in my soektog na myself en die doel waarvoor God my geskape het.
Die lewe het my geleer dat daar net 3 maniere is waarmee ek besluite kan neem: Dié is my Kop, my Hart en my Passie.
My kop is ‘n geruis tussen ADHD, OCD en rasionele chaos. My vrou sê self my kop is nie altyd lekker nie! Dit is mos gevaarlik as ‘n man begin d**k, want ‘n massiewe paradigma skuif is op pad. My vrou sê ek kry ‘n sekere frons op my voorkop en dan volg ‘n skrikwekkende plan wat ek met groot entoesiasme met haar wil deel en uitleef. Nie eers te praat van besluite neem met my hart nie.
My hart neem emosionele besluite. Dit wissel van laaggety na hooggety in ‘n oogwink! Ja, ek is eerlik met jul almal, wanneer ek met my hart droom is ek soos golwe in die oseaan op en af, op en af… ek raak so deurmekaar dat my vrou as my lewensredder my menigmaal uit die see moet kom red.
Wat bly oor vir my om my lewe doelgerig te stuur in die rigting waarin ek moet beweeg? Met al my ondervinding in die lewe waarin ek self baie hoogtepunte en laagtepunte beleef het, is daar geen plaasvervanger vir Passie nie. Kom ek staan ‘n oomblik hierby stil. Ek dikteer vir julle Jeremia 1:5 ( 20/20 vertaling).
“Nog voordat Ek jou gevorm het in die baarmoeder, het Ek jou geken; nog voordat jy uitgegaan het uit die moederskoot, het Ek jou geheilig….”
Passie word vergestalt in jou skeppingsdoel. Passie het niks te make met ‘n kopbesluit nie of selfs ‘n hartbesluit nie, dit is in jou DNA, jy is geskep
daarvoor, omrede God jou reeds voor die begin van tyd afgesonder het vir ‘n heilige taak!!
Kom aan! Sê bietjie WOW!
Ek wil graag in my slotgedagte aan jul die krag hiervan demonstreer met Jesus se optrede in die tuin van Getsemane soos neergepen in die Evangelie van Lukas in Lukas 22: 39-46.
Jesus se kop, Sy hart en Sy passie word so mooi uitgebeeld. In hierdie gedeelte word ons voorgestel aan ons Here waar Hy presies weet wat nou gaan volg. Hy gaan ly, sterf en in die doderyk neerdaal. Natuurlik gaan Hy uit die dood opstaan, maar hier in die tuin van Getsemane is Hy bewus van ly, sterf en neerdaal.
Sy kop vra in : 42” …Vader as U wil, neem hierdie beker van my weg.” Sy hart is vreesbevange.
Vers 44 verklaar dat Hy deur intense angs oorval is, maar Sy passie vir my en jou word tentoongestel toe Hy die voetstappe van die soldate hoor, opstaan, na Judas toe stap en Judas Hom die verraaierskus gee.
Jesus se Passie vir Sy skeppingsdoel het Sy kop en Sy hart oorweldig en deur Sy passie is ek en jy in Genade onbeskryflik gevrywaar van die mag van die Bose. AMEN!
Dalk, en dis net ‘n voorstel, moet ek en jy in 2025 bietjie minder kopwerk en hartwerk doen en vasgryp aan die Passie waarmee God jou hier op aarde geskep het.
Dalk d**k jy te veel oor jouself en jou foute. Dalk d**k jy te veel oor jou huwelik of jou werk, wat ookal. ...
Kom ons sit die Passie terug in die Pas waarmee ek en jy gaan leef!
Tree vir tree met vuur, ywer en passie.
Gaan kniel in jou Getsemane en vind jou mojo voor die aangesig van die Here, wat breed glimlag as Hy jou sien, immers is dit Sy begeerte dat jy voluit moet leef!!
2025 vir Jesus!!
Dr Andre
Uit die pen van ‘n life coach
Send a message to learn more
