17/11/2025
Padkos vir vandag:
Paar dinge hierdie naweek het my laat besef: die jaar was lank.
Ons senuwees is kort, ons moegheid is diep…
Orals op sosiale media sien jy dieetmiddels, oefenplanne en leefstylaanwysings — alles om ons liggame “aanvaarbaar” te maak. Skoonheidswenke om ons gesigte jonger te laat lyk, want hemel help, moenie oud word nie!
Maar skaars iemand praat oor die psigiese en geestelike moegheid waarmee ons worstel. Daar is geen vinnige hulpmiddel vir dit nie.
Vrydag gesels ek met ’n vriendin en ons kyk bietjie terug oor die jaar. Toe besef ek weer hoe elke dag iets uit ons vat… hoe elkeen iewers ’n punt het waar sy leeg raak.
Vandag deel ek hierdie Bybelvers met jou, en my gebed is dat dit jou kom vol maak.
Ek wil vir jou sê: dit is OK om nie OK te wees nie.
Dit is ok om kwaad te voel.
Dit is ok om teleurgesteld te wees in hoe jou jaar gelyk het.
Dit is ok om te d**k: “Ek kan nie meer nie.”
Dit is ok om soms net te wil uitplug en afsit.
Maar hier is my raad om weer vol te word:
Lees die vers.
Plug in by God vir nuwe krag.
Sing die regte lied, al wil jou lyf nie saam sing nie.
Kies om stil te bly en ’n oomblik te vat voor jy reageer.
Moenie jouself op die rak sit nie.
Jou lyf hoef nie die wêreld se standaard te dra nie.
Dit is ok om plooie te hê — dis ’n voorreg wat baie nooit gekry het nie.
Dit is ok om ’n bietjie ekstra op die boude te hê — dit beteken jy lééf.
Lag wanneer jy wil huil.
Beweeg wanneer alles in jou wil bly lê.
Sing wanneer jy wil skree.
Bid wanneer jou woorde opraak.
God sien. God weet. En God dra.
“Maar dié wat hulle hoop op die Here stel, sal nuwe krag kry. Hulle vlieg hoog, soos arende. Hulle sal hardloop en nie moeg word nie. Hulle sal loop en nooit vermoeid word nie.”
JESAJA 40:31 NLV
Maar dié wat hulle hoop op die HERE stel, sal nuwe krag kry. Hulle vlieg hoog, soos arende. Hulle sal hardloop en nie moeg word nie. Hulle sal loop en nooit vermoeid word nie.
