Spitali i Përgjithshëm Gjilan faqja zyrtare

27/04/2026

Njoftim për opinionin publik

Menaxhmenti i Spitalit të Përgjithshëm Gjilan njofton opinionin publik se gjatë çdo dite pune, në ambulancën specialistike të ortopedisë trajtohen mesatarisht rreth 55 pacientë.

Ofrimi i këtij shërbimi është specifik, pasi në shumicën e rasteve kërkohet edhe përfshirja e shërbimit të radiologjisë. Në këto raste, po paraqiten vështirësi në sistemimin e radhëve.

Aktualisht, jemi duke zbatuar një plan që do të mundësojë rritjen e kapaciteteve të burimeve njerëzore. Kjo do të na lejojë të ndajmë më shumë kohë për secilin pacient që kërkon shërbim në ambulancën e ortopedisë, duke siguruar vazhdim normal të punës.

Duke qenë se këto ditë kemi një fluks më të lartë të pacientëve në këtë shërbim, kërkojmë mirëkuptimin tuaj.

Po ashtu, duke marrë për bazë faktin se aktualisht ndodhemi në fazën e renovimit të shërbimeve kryesore, kërkojmë nga qytetarët – shfrytëzues të shërbimeve tona – mirëkuptim.

Njëkohësisht, ju sigurojmë se stafi i Spitalit të Përgjithshëm Gjilan do të bëjë maksimumin për ofrimin sa më cilësor dhe në kohë të shërbimeve shëndetësore.

25/04/2026

Donacion për Spitalin e Përgjithshëm Gjilan.

Me kënaqësi ju njoftojmë se Spitali i Përgjithshëm Gjilan ka pranuar një donacion të rëndësishëm për shërbimet tona, i cili do të ndikojë drejtpërdrejt në përmirësimin e kujdesit ndaj pacientëve.

Drejtori i Spitalit të Përgjithshëm Gjilan Dr.Afrim Cana shprehu mirënjohjen e thellë për donatorët: Xhamia “Shtëpia e Paqes” dhe Shoqata “Parandalo” me seli në Zyrih (Zvicër), për mbështetjen dhe kontributin e tyre në avancimin e shërbimeve shëndetësore.

Ky donacion do të kontribuojë në rritjen e cilësisë së trajtimit, lehtësimin e punës së stafit shëndetësor dhe ofrimin e kujdesit më efikas dhe më të sigurt për pacientët tanë.

Bashkëpunime të tilla janë thelbësore për zhvillimin dhe përmirësimin e vazhdueshëm të shërbimeve tona shëndetësore.

16/04/2026

Sot, në Spitalin e Përgjithshëm në Gjilan, pritëm për vizitë një delegacion nga Danimarka.

Drejtori i Spitalit të Përgjithshëm në Gjilan Dr.Afrim Cana u dëshiroi mirëseardhje përfaqësuesve dhe i njoftoi se jemi në dijeni për bashkëpunimin e shtetit danez me Republikën e Kosovës.

Ne tashmë kemi përvojë të gjatë në mënyrën se si funksionon procesi i ofrimit të shërbimeve shëndetësore për personat e burgosur. Si spital i përgjithshëm, ofrojmë shërbime për të gjithë pacientët që kanë nevojë, ndërsa për të burgosurit zhvillojmë procedura më specifike, por pa dallime në ofrim të shërbimeve.

Delegacioni danez njoftoi se janë në proces të ofrimit të disa shërbimeve shëndetësore specialistike brenda hapësirave të burgut, por megjithatë spitalin e shohim si të pashmangshëm për disa shërbime.
Gjatë kësaj vizite, do të diskutojmë rreth mënyrës se si do të zhvillohen procedurat për ofrimin e këtyre shërbimeve.

08/04/2026

Njoftim

24/03/2026

Drejtori i Spitalit të Përgjithshëm Gjilanit Dr.Afrim Cana ka realizuar një vizitë tek pacientët e dializës dhe stafi shëndetësor, të cilët aktualisht po trajtohen në Spitalin e Ferizajt, për shkak të renovimit të shërbimit të dializës në Spitalin e Gjilanit.

Gjatë kësaj vizite, Dr.Afrim Cana u njoh nga afër me kushtet e trajtimit dhe shprehu mirënjohje për përkushtimin e stafit, duke theksuar rëndësinë e vazhdimësisë së shërbimeve cilësore për pacientët.

Pacientët e dializës u shprehën të kënaqur me shërbimet e ofruara dhe kujdesin që po marrin gjatë kësaj periudhe, duke vlerësuar angazhimin e stafit mjekësor dhe kushtet e trajtimit.

Me këtë rast, drejtori falënderoi stafin, menaxhmentin e Spitalit të Ferizajt për bashkëpunimin dhe mbështetjen e ofruar, duke theksuar se kjo ndihmë ka qenë thelbësore për garantimin e trajtimit të pandërprerë të pacientëve, të cilët shum shpejt do të rikthehen në Spitalin e Gjilanit.

20/03/2026

16/03/2026

Njoftim për Qytetarët

Menaxhmenti i SP Gjilan njofton qytetarët – shfrytëzuesit e shërbimeve tona se aktualisht jemi në fazën e renovimit të hapësirave kryesore, prandaj, gjatë këtyre dy viteve do të përballemi me reduktim të kapaciteteve tona, por ju sigurojmë se angazhimi dhe përkushtimi i personelit profesional do të jetë në maksimum.

SP Gjilan, si asnjëherë më parë, ka mbështetjen e vazhdueshme nga MSh si dhe ShSKUK në realizimin e projekteve të mëdha dhe arritjen e synimeve tona.

Gjatë kësaj periudhe kohore kërkojmë gjithashtu mirëkuptimin tuaj, pasi që jemi duke u përballur edhe me mungesë të disa profileve të profesionistëve shëndetësorë, por jemi në proces të zgjidhjes shumë të shpejtë edhe të këtij problemi.

Po ashtu, në rast të pakënaqësive të evidentuara ndaj personelit shëndetësor, ju sigurojmë se do të merren masat adekuate që janë në fuqi.

11/03/2026

Sot janë prezantuar rezultatet e auditimit në shërbimin e Emergjencës në Spitalin e Përgjithshëm në Gjilan.

Prezantimin e realizoi Dr.Ramadan Halimi, i cili në detaje prezantoi punën e ekipit të auditimit në shërbimin e emergjencës për monitorimin dhe vlerësimin e cilësisë së shërbimeve shëndetësore të ofruara pacientëve në situata urgjente.

Ky ekip analizoi procedurat klinike dhe administrative, kontrolloi përputhshmërinë me protokollet dhe standardet mjekësore, si dhe identifikoi mundësi për përmirësimin e kujdesit ndaj pacientëve.

Drejtori i spitalit, Dr.Afrim Cana, përgëzoi ekipin e auditimit dhe theksoi se përmes auditimeve periodike dhe analizës së të dhënave në të gjitha shërbimet e spitalit do të kontribuohet në rritjen e cilësisë dhe sigurisë së pacientëve, si dhe në rritjen e efikasitetit të shërbimeve.

Synimi ynë është përmirësimi i cilësisë në mënyrë të vazhdueshëme në të gjitha shërbimet, e sidomos në atë të Emergjencës. I ftojmë të gjitha njësitë e tjera që të respektojnë me përpikmëri PSO për shërbimin e Emergjencës.

05/02/2026

Gjatë periudhës janar–dhjetor 2025, në Repartin e Pediatrisë dhe ambulancat specialistike janë regjistruar:

• 14, 706 vizita ambulantore
• 809 pranime në repart
• 866 raste në observim
• 16 transfere në QKUK – Prishtinë

Në kuadër të punës sonë janë realizuar ndërhyrje dhe shërbime specialistike, si: trajtimi i konvulsioneve febrile, laringjiteve subglotike, bronkioliteve, si dhe ekzaminime EKG, ECHO dhe ultrazë të abdomenit. Janë zhvilluar gjithashtu konsultime të vazhdueshme me shërbimet e tjera spitalore, si dhe prezantime të rasteve specifike që kërkonin konsultim ekipor, qoftë për trajtim, qoftë për transfere në QKUK.

Aktiviteti ynë është i orientuar drejt rritjes së efikasitetit në trajtimin e fëmijëve, me qëndrime sa më të shkurtra spitalore dhe shfrytëzueshmërinë e kapaciteteve.

04/02/2026

Komandanti i Kforit TURK viziton Spitalin e Përgjithshëm Gjilan.

Vizita u realizua në Shërbimin e Gjinekologjisë, shërbim i cili luan një rol thelbësor në ruajtjen dhe përmirësimin e shëndetit të grave, duke ofruar kujdes mjekësor për një numër të madh pacientesh çdo vit.

Për të garantuar shërbime cilësore, të sigurta dhe në përputhje me standardet bashkëkohore mjekësore, ekziston nevoja për përmirësim dhe pajisje shtesë në infrastrukturë, aparatura mjekësore dhe materiale.

Mbështetja nga Kfori TURK në formën e donacioneve do të kontriboj drejtpërdrejt në rritjen e cilësisë së shërbimit, përmirësimin e kushteve të trajtimit dhe në përfitim të drejtpërdrejtë të pacienteve që trajtohen në shërbimin e gjinekologjisë.

27/01/2026

“Pas 40 viteve në shërbim të pacientëve, pensionohet infermierja Nesibe Kosumi nga Mjekimi Intensiv, në Sallën e Kirurgjisë.

Me rastin e pensionimit të infermieres Nesibe Kosumi, e cila ka shërbyer mbi 40 vite në shëndetësinë publike, menaxhmenti i Spitalit ka vlerësuar lart kontributin e saj duke i ndarë mirënjohje, si dhe duke e uruar për pensionimin me rastin e ditëlindjes së saj të 65-të.

Nesibe Kosumi shërbeu me përkushtim dhe profesionalizëm, duke dhënë një kontribut të çmuar në kujdesin dhe mirëqenien e pacientëve. Për këtë angazhim të jashtëzakonshëm dhe punë të palodhur ndër vite, i shprehim mirënjohjen tonë më të thellë, duke i dëshiruar shëndet të plotë dhe pension të mirë.