17/07/2025
Biografia e Dr. Hajriz H. Ibrahimit
Dr. Hajriz H. Ibrahimi u lind më 6 maj 1959 në fshatin Vërbicë e Zhegocit, komuna e Gjilanit. Në moshën trevjeçare, familja e tij u shpërngul në qytetin e Gjilanit, ku ai kreu shkollimin parafillor, fillor dhe gjimnazin “Zenel Hajdini” në drejtimin e shkencave natyrore, duke u dalluar si një nxënës i shkëlqyeshëm. Dr. Hajrizi është i martuar dhe baba i tre fëmijëve.
Studimet e larta i përfundoi në Fakultetin e Mjekësisë pranë Universitetit të Prishtinës në drejtimin Mjekësi e Përgjithshme, duke fituar titullin Doktor i Mjekësisë. Në vitin 1982, për shkak të bindjeve të tij politike kundër regjimit të atëhershëm, u burgos padrejtësisht nga autoritetet.
Karrierën e tij si mjek e filloi në vitin 1988 në shërbimin e vaksinimit pranë ish-Shtëpisë së Shëndetit (tani QKMF) në Gjilan. Më pas, shërbeu si mjek në fshatrat Zhegër dhe Shurdhan. Në vitin 1994, u largua me dhunë nga puna nga regjimi i kohës, por po atë vit themeloi ordinancën private të mjekësisë së përgjithshme “Preventiva” në Gjilan. Kjo ordinancë u bë strehë për pacientë nga i gjithë rajoni, përfshirë refugjatë nga Drenica, dhe vend praktikash për nxënës, studentë dhe mjekë të rinj.
Në vitin 1996, ndjek pasionin e tij për mjekësinë duke filluar specializimin në Pediatri me vetëfinancim. Ai gjithashtu përfundoi specializime në Mjekësi Familjare dhe Pediatri.
Pas luftës, në vitin 1999, Dr. Hajrizi u rikthye në punë në dispanzerin e fëmijëve pranë QKMF Gjilan. Në vitin 2000, u emërua Drejtor i QKMF-së, një mandat katërvjeçar gjatë të cilit dha kontribut të madh në zhvillimin e Mjekësisë Familjare, realizimin e projekteve të rëndësishme dhe ndërtimin e partneriteteve, si ai me Dartmouth Medical School në SHBA.
Për shumë vite, Dr. Hajrizi ka qenë një pediatër i përkushtuar dhe shumë i dashur për fëmijët e komunës së Gjilanit, duke kryer vizita në çerdhe dhe duke qenë pjesë e komisioneve për vlerësimin e shëndetit të fëmijëve me aftësi të kufizuara pranë Drejtorisë së Arsimit. Ai ka mbajtur pozita të rëndësishme drejtuese dhe ka kontribuar në vazhdimësi në përmirësimin e sistemit shëndetësor në vend.
I njohur për qetësinë, humanizmin dhe profesionalizmin e tij, Dr. Hajriz Ibrahimi u pensionua më 6 maj 2024, pas një karriere të gjatë dhe të ndritur në shërbim të shëndetit publik dhe privat, pranë QMF "28 Nëntori" në Gjilan.
