07/08/2025
Fëmijët me autizëm shpesh shfaqin ndjeshmëri të lartë senzore, veçanërisht ndaj stimujve zanorë, prekjes apo vibrimit. Gjatë prerjes së flokëve, mund të shkaktohet shqetësim nga zhurma dhe ndjesia që jep makina prerëse, kontakti fizik i papritur ose dridhjet e makinës. Këto përvoja mund të shkaktojnë rritje të ndjeshme të ankthit dhe parehatisë, duke çuar në sjellje sfiduese si përpjekje për t’u larguar nga karriga, të qara, hedhje objektesh (si reagim mbrojtës) ose sjellje të tjera të papërshtatshme — disa prej të cilave mund të jenë vetëlënduese ose të rrezikshme për të tjerët. Për të siguruar një përvojë më të qetë dhe të menaxhueshme, është thelbësore që prindërit të marrin parasysh rekomandimet e mëposhtme: ➡️ Zgjedhni profesionistë të trajnuar: Sigurohuni që prerja e flokëve të kryhet nga persona që kanë përvojë me fëmijë dhe që njohin teknika të përshtatshme të menagjimit të sjelljes (janë bashkëpunues), ➡️ Ulni ngarkesën senzore: Përdorni kufje që bllokojnë zhurmën, nëse fëmija shqetësohet nga zhurma e makinës. Ose, nëse është e mundur, përzgjedhni makina që janë më të qeta dhe me më pak dridhje. ➡️ Përdorni lodra ose objekte qetësuese: Lejoni fëmijën të angazhohet me një lodër të preferuar gjatë prerjes. Përforconi përpjekjet që bën për të qëndruar i qetë me lavdërime si “të lumtë ti po rri shumë i qetë” ose shpërblime të vogla ushqimore. ➡️ Mësoni strategji vetërregulluese: Nëse fëmija është në gjendje t’i kuptojë, përdorni teknika si frymëmarrja e thellë, numërimi apo fraza qetësuese dhe përforconi sjelljet pozitive me shpërblime të përshtatshme. ➡️ Krijoni komunikim të qartë dhe jepni njoftime verbale paraprake për çdo hap të procesit. Ndani procesin në hapa më të vegjël dhe lejoni pushime të shpeshta nëse fëmija shfaq shenja shqetësimi. ➡️ Mos shmangni situatën vetëm pse fëmija qanë tek frizeri. Kjo qasje mund të forcoj frikën dhe të ul zhvillimin e aftësive të reja. Ndihmojeni fëmijën të përballet gradualisht me situatën, duke fituar strategji të përballimit dhe me kalimin e kohës fëmija do t’ia dal💪🏻
