Armend Agolli

18/04/2026

Sipas raporteve deri në prill 2026, senatori amerikan Bernie Sanders ka qenë ndër të paktët zëra kritikë ndaj politikës së SHBA-së për luftën në Gaza.

Mbi 20,000 fëmijë palestinezë raportohet se janë vrarë që nga tetori 2023, ndërsa SHBA ka dhënë rreth 22 miliardë dollarë ndihmë ushtarake për Izraelin. Organizatat ndërkombëtare paralajmërojnë për uri masive dhe shkatërrim të gjerë të jetës civile.

Por ajo që trondit edhe më shumë është heshtja – nga mediat ndërkombëtare dhe nga elita politike perëndimore.

Paramendo për një moment të kundërtën: nëse këta fëmijë do të ishin izraelitë… bota do të ishte në këmbë, titujt kryesorë do të shpërthenin çdo ditë, dhe reagimi politik do të ishte i menjëhershëm.

Kur standardet ndryshojnë sipas viktimës, atëherë nuk kemi më drejtësi – kemi hipokrizi.

18/04/2026

“Ja ku është. Kjo është shtëpia ime . Kjo jemi ne.”

Më 14 shkurt 1990, vetëm pak minuta para se të mbylleshin përgjithmonë kamerat e sondës Voyager 1, shkencëtarët e NASA morën një vendim simbolik: e kthyen sondën pas për të fotografuar Tokën nga një distancë marramendëse — mbi 3 miliardë milje larg.

Rezultati ishte ajo që sot e njohim si Pale Blue Dot.Një pikë e vogël drite në një rreze dielli.

Aty është gjithçka që kemi njohur ndonjëherë:
të gjitha dashnitë, luftërat, ëndrrat, fitoret dhe humbjet;çdo njeri që ka jetuar ndonjëherë — ka jetuar aty.Në atë pikë të vogël.

💥 Ndoshta kjo foto nuk na mëson sa i madh është universi.Por sa të vegjël jemi ne dhe sa e madhe është përgjegjësia jonë ndaj njëri-tjetrit.

18/04/2026

Ankthi që po trajtohet gabimisht si dhimbje shpine

Shpesh po shoh pacientë me ankth që trajtohen me barna kundër dhimbjes dhe me fizioterapi.Shumë prej tyne nuk kanë guxim me shku te psikiatri apo psikologu – jo pse nuk duan ndihmë, por pse kanë frikë prej paragjykimeve.
Në vend të mbështetjes nga familja dhe shoqëria, ata të shkretit shpesh përballen me këshilla të gabuara:
– “T’kanë bo sehire, shko te hoxha se s’është kurgjo”
– ose versioni “modern”: “veç mendo pozitiv e të kalon”

E vërteta është ndryshe.

Ankthi nuk shërohet me fjalë.
Me i thanë dikujt “mendo pozitiv”, shpesh vetëm ia rrit barrën dhe ndjenjën e fajit.

Problemi bëhet edhe ma i madh kur këta pacientë paraqiten me dhimbje fizike, sidomos në shpinë.Dhe këtu fillon gabimi klasik:trajtohen me analgjetikë dhe fizioterapi, pa u kuptu shkakun e vërtetë.
Shpesh i dëgjoj:
“Doktor, kam pi barna dhe kam ba mbi 100 fizioterapi, por nuk po më kalon.”
Sepse problemi nuk është vetëm fizik.

Në shumë raste që kam trajtu, bashkëpunimi me psikiatrin/psikologun ka qenë dhe mbetet çelësi i përmirësimit dhe shërimit.
Me trajtu vetëm dhimbjen, e me injoru ankthin, është si me fik alarmin e jo zjarrin.

💥 Si gjithmonë në mjekësi, por veçanërisht këtu, anamneza dhe ekzaminimi i mirë e zbulojnë të vërtetën në shumicën e rasteve.

Kur trajtohet shkaku pra ankthi, edhe dhimbja fillon me u zhduk.

Mesazhi:
Mos trajtoni vetëm trupin kur ndërkohë vuan shpirti.

Neurokirurg i boshtit kurrizor | Intelektual /Patriot | Bamirës

16/04/2026

Shumë po më pëlqen kjo: “Shoqëria zhvillohet kur të moshuarit mbjellin pemë edhe pse e dinë që kurrë nuk kanë me u ulë nën hijen e tyre.”
Kjo thënie bart një të vërtetë të madhe: shoqëria përparon kur njerëzit nuk mendojnë veç për veten dhe për sot, por punojnë për një të ardhme që ndoshta vetë nuk kanë me e përjetu.
Një brez ndërton, sakrifikon e mbjell që brezi tjetër me korrë e me jetu ma mirë.
Por te na shpesh ndodh e kundërta. Mendojmë për fitimin e shpejtë, për interesin personal, për pushtetin e momentit. Harrojmë “drunjtë” që duhet me i mbjellë sot për fëmijët tanë nesër.
E kështu mbesim pa hije, tue kërku hije prej pemëve që askush nuk i ka mbjellë.
Shoqëria nuk ndërtohet me atë që merr, por me atë që lë pas.

16/04/2026

MJERË AI KOMB

Poezi nga Lawrence Ferlinghetti (sipas Kahlil Gibranit)

Mjerë ai komb njerëzit e të cilit janë dele
dhe barinjtë e të cilit i çorientojnë ato

Mjerë ai komb udhëheqësit e të cilit janë gënjeshtarë
urtakët e të cilit janë të heshtur
dhe fanatikët e të cilit faniten në eter

Mjerë ai komb që nuk e ngre zërin e vet
veçse për të lavdëruar pushtuesit
dhe për ta shpallur mujsharin hero
dhe që synon të sundojë botën
me forcë e me torturë

Mjerë ai komb që nuk njeh
asnjë gjuhë tjetër përveç asaj të vetes
asnjë kulturë tjetër përveç asaj të vetes

Mjerë ai komb frymëmarrja e të cilit është paraja
dhe fle gjumin e të tejngopurve

Mjerë ai komb oh mjerë ata njerëz
që lejojnë që të drejtat e tyre të shkatërrohen
dhe që liritë e tyre të zhduken

Vendi im për ty lotoj
tokë e ëmbël e lirisë
(2007)
Përktheu: Agron Shala

13/04/2026

Dhimbja e fortë nervore nuk është thjesht një sinjal nga trupi – është një britmë e brendshme që nuk dëgjohet me veshë, por me vetëdije.
Ajo nuk vjen si një plagë e dukshme, por si një zjarr i padukshëm që djeg nga brenda, pa lënë gjurmë në sipërfaqe. Është një përjetim që e ndan njeriun nga rehati e zakonshme dhe e vendos përballë vetes aty ku çdo sekondë bëhet më e gjatë dhe çdo lëvizje merr kuptim.
Dhimbja nervore është paradoks: nuk të vret, por të lodh deri në kufijtë e shpirtit; nuk shihet, por sundon jetën; nuk ka formë, por e deformon përditshmërinë.
Dhe ndoshta, në thelb, dhimbja nervore është testi më i vështirë i njeriut:
jo sa shumë mund të durosh,
por si arrin të jetosh, edhe kur dhimbja nuk largohet.
💥Përballë dhimbjes nuk ka heronj – ka vetëm njerëz që mësojnë të jetojnë me të.

12/04/2026

Dhimbja e fortë nga kompresioni i nervit nuk trajtohet me iluzione, hixhame apo me “receta simbolike” me paracetamol, magnez e vitamina.

Në praktikë po shohim shpesh pacientë me hernie diskale apo stenozë – me dhimbje radikulare të forta – që dërgohen në shtëpi pa trajtim adekuat.
Ndërkohë, Tramadol (Trodon) apo Morphine (Morfina) shmangen nga frika e varësisë dhe efekteve anësore.
Po, opioidet kanë rrezik.
Por përdorimi afatshkurtër, i kontrolluar (2–3 javë), në dhimbje të forta është i justifikuar dhe shpesh i domosdoshëm.

Mos-trajtimi i dhimbjes nuk është “siguri” – është neglizhencë klinike.
Dhimbja te forta radikulare:
• e mban pacientin pa gjumë
• e paaftëson
• e vonon rehabilitimin

Mjekësia është balancë rrezik–përfitim, jo shmangie nga frika.
Nëse ke frikë me përdor një bar që e njeh mirë, problemi nuk është te ilaçi – por te mungesa e sigurisë për ta përdorur në kohën dhe dozën e duhur.