Blerim Myftiu, neurolog

12/01/2026

MUNGESA E SPECIALISTËVE NË BRITANI TË MADHE SHKAKTON VONESA NË TRAJTIMIN E INFARKTEVE AKUTE DHE LË PASOJA AFATGJATA

Mijëra njerëz që pësojnë goditje në tru po përfundojnë me paaftësi të rënda ose po vdesin, sepse Shërbimi Shëndetësor britanik (NHS) ka shumë pak specialistë për t’i trajtuar ata mjaftueshëm shpejt. Një mungesë kronike e mjekëve konsulentë për goditjen në tru në të gjithë NHS-në do të thotë se pacientët po përballen me pasoja të tmerrshme për shkak të vonesave në marrjen e shërbimit që për shkrirjen e trombit (tromboliza intravenoze) në arteriet trunore apo për ndërhyrjen kirurgjike (trombektomi mekanike) për largimin e tij.

Shumë spitale nuk janë në gjendje të diagnostikojnë urgjentisht pacientët me goditje në tru dhe t’u japin trajtim kritik në kohë për të maksimizuar shanset e një rikuperimi të plotë sepse nuk ka mjaft mjekë. Mungesa do të thotë se kur njerëzit pësojnë një goditje akute në tru, ata nuk mund të jenë të sigurt se do të marrin mendimin e një eksperti për të vendosur diagnozën dhe trajtimin e duhur në kohën e duhur.

Rreth 100 mijë njerëz në Mbretërinë e Bashkuar pësojnë goditje në tru çdo vit. Midis 10 mijë dhe 20 mijë prej tyre kanë vdekur ose kanë pësuar paaftësi serioze për shkak të vonesave në trajtim të lidhura me mungesën e stafit. Raporti i fundit i Programit kombëtar të auditimit të goditjes në tru zbuloi se në vitet 2024–25 u deshën 4 orë e 11 minuta për të çuar në spital një person që kishte pësuar goditje në tru — më shumë se në 2023–24 dhe më shumë se 90 minuta më gjatë se një dekadë më parë.

Vetëm 46.5% e pacientëve me goditje në tru vitin e kaluar u shtruan në një njësi të specializuar për goditjen në tru brenda 4 orëve nga mbërritja në spital, afërsisht në të njëjtin nivel me vitin paraardhës, por më shumë se 10 pikë përqindjeje më pak se një dekadë më parë.

Hulumtime të reja të kryera nga Asociacioni i mjekëve anglezë dhe irlandezë kanë treguar se boshllëqet në fuqinë punëtore mjekësore për goditjen në tru po përkeqësohen, pavarësisht plakjes së popullsisë dhe stileve jo të shëndetshme të jetesës që po lënë më shumë njerëz në nevojë për trajtim spitalor pas goditjes në tru.

Anketa e tij në 100 spitale në Angli që ofrojnë kujdes akut për goditjen në tru zbuloi se:
• 70% e njësive të goditjes në tru kanë mungesë të të paktën një konsulenti për goditjen në tru, dhe shumë prej tyre u mungojnë dy.
• 53 nga 84 spitalet që u përgjigjën kishin vende të lira pune për gjithsej 96 konsulentë.
• NHS-ja mbështetet shumë te mjekët me kontrata të përkohshme (locum) për të mbushur boshllëqet e shkaktuara nga vështirësitë në rekrutimin e konsulentëve të rinj.
• 10% e 423 konsulentëve të përhershëm të NHS-it pritet të dalin në pension në pesë vitet e ardhshme, duke përkeqësuar mungesën ekzistuese.



https://www.theguardian.com/society/2026/jan/05/nhs-shortage-stroke-specialists

10/01/2026

A FLENË KANDILAT E DETIT?

As kandilat e detit dhe as anemonat e detit nuk kanë tru. Por, sipas një studimi të botuar në Nature Communications, këto kafshë flenë në mënyra që janë çuditërisht të ngjashme me njerëzit. Gjetjet e forcojnë teorinë sipas së cilës gjumi ka evoluar, të paktën pjesërisht, për të mbrojtur ADN-në në qelizat individuale nervore, duke ndihmuar në riparimin e dëmtimeve që grumbullohen gjatë zgjimit.

Punimet e mëparshme kanë treguar se kandilat e detit hyjnë në një gjendje të ngjashme me gjumin, por ky studim është i pari që e karakterizon këtë fenomen te anemonat e detit dhe i pari që përshkruan në detaje modelet e gjumit të të dyja këtyre organizmave.

09/01/2026

A KA DALLIM DHËNIA E RITUXIMABIT NË ÇDO 6 APO 12 TE SKLEROZA MULTIPLE

Rituximabi është një antitrup monoklonal i cili nuk ka aprovim zyrtar për përdorimin te skleroza multiple (MS), mirëpo në shumë shtete (sidomos skandinave dhe perëndimore në Evropë) aplikohet për trajtimin e sklerozës multiple. Konsiderohet si trajtim me efikasitet të lartë dhe është i përafërt në kuptimin molekular me Ocrelizumabin, i cili paraqet versionin e aprovuar zyrtarisht për trajtimin e MS-së.

Dozimi standard i Rituximabit është aplikimi intravenoz çdo 6 muaj. Qëllimi i një studimi ka qenë që të krahasojë efektin e dozimit çdo 6 muaj karshi atij çdo 12 muaj në rrezikun e shtimit të relapseve (keqësimeve apo sulmeve) të MS-së. Pacientët e përzgjedhur kanë qenë ata që kanë marrë një vit trajtim, nuk kanë pasur aktivitet të sëmundjes gjatë vitit. Prej pacientëve të identifikuar, trajtimi i 140 prej tyre vazhdoi me dozimin çdo 12 muaj, kurse 468 të tjerë vazhduar trajtimin klasik me infuzione çdo 6 muaj.

Pas 4 vitesh të përcjelljes, zgjatja e intervalit të trajtimit me rituksimab nga çdo 6 në çdo 12 muaj nuk u shoqërua me rritje domethënëse të relapseve apo sulmeve klinike. Mbetet të bëhet replikimi i të dhënave dhe zgjerimi i studimit për të parë nëse dozimi një herë në vit do të jetë i mjaftueshëm për trajtimin e mëtejmë te pacientëve me MS.

08/01/2026

BIOMARKERI I RI MUND TË NDIHMOJË NË IDENTIFIKIMIN E PACIENTËVE ME MS PËR TRAJTIM ME INHIBITORËT E BTK-SË

Ekuilibri ndërmjet dy molekulave sinjalizuese të sistemit imunitar — CXCL13 dhe BAFF — mund të ndihmojë në identifikimin e inflamacionit vështirë të trajtueshëm në tru dhe në palcë kurrizore, i cili mendohet të jetë një nxitës kryesor i përparimit të paaftësisë në sklerozën multiple (MS).

Këto gjetje mund të ndihmojnë në përcaktimin e pacientëve që kanë më shumë gjasa të përfitojnë nga inhibitorët e BTK-së — trajtime që besohet se synojnë këtë formë të inflamacionit të “kompartmentalizuar” — si dhe të ndihmojnë në përzgjedhjen e kandidatëve për studimet e ardhshme klinike. Inhibitorët e BTK-së kanë dhënë rezultate mikse në hulumtimet klinike. Ky studim është publikuar në revistën Nature Immunology.

Ndryshe nga inflamacioni që shihet në format relapsuese të MS-së (RRMS), ku qelizat imune hyjnë në mënyrë të përsëritur në tru dhe palcë kurrizore duke shkaktuar dëmtime, format progresive të sëmundjes shkaktohen kryesisht nga inflamacioni brenda vetë sistemit nervor qendror.

Qelizat imune vendosen në cipat (meningjet) që e rrethojnë trurin dhe palcën kurrizore, ku formojnë grumbuj të quajtur indet limfoide terciare (TLT), dhe vazhdojnë të nxisin dëmtimin e korteksit edhe kur inflamacioni periferik është mirë i kontrolluar. TLT-të z ngjajnë nyjeve limfatike dhe përbëhen kryesisht nga qelizat B, qeliza imune që prodhojnë antitrupa dhe luajnë një rol të rëndësishëm në patogjenezën e MS-së. Megjithatë, mënyra se si formohen këto struktura dhe si mund të synohen më mirë terapeutikisht ka mbetur e paqartë.

Në eksperimentet fillestare, studiuesit i trajtuan minjtë me remibrutinib, një nga inhibitorët e BTK-së që po hetohet si trajtim për MS-në. BTK është një enzimë e përfshirë në aktivizimin inflamator të qelizave B. Ata zbuluan se trajtimi çoi në një reduktim të formimit të TLT-ve te minjtë dhe gjithashtu e uli dëmtimin e qelizave nervore në korteks.

Për t’i kuptuar mekanizmat molekularë të përfshirë, ekipi analizoi se si trajtimi ndikonte në nivelet e citokinave të ndryshme, molekula sinjalizuese që rregullojnë aktivitetin e qelizave imune. Rezultatet treguan se trajtimi me remibrutinib i uli nivelet e citokinës CXCL13 dhe njëkohësisht i rriti nivelet e citokinës BAFF. Ekuilibri ndërmjet këtyre dy molekulave sinjalizuese dukej se përcaktonte nëse do të formoheshin TLT-të. Konkretisht, kur nivelet e CXCL13 ishin të larta dhe nivelet e BAFF të ulëta, TLT-të formoheshin. Por kur nivelet e CXCL13 ishin të ulëta dhe ato të BAFF të larta, formimi i këtyre komplekseve imune nxitëse të sëmundjes frenohej dhe kishte më pak dëmtim të indeve.

07/01/2026

TOLEBRUTINIBI REFUZOHET SI BAR PËR TRAJTIMIN E SKLEROZËS MULTIPLE

Pas disa muajsh vonesash, Administrata Amerikane e Ushqimit dhe Barnave (FDA) ka refuzuar aplikimin e kompanisë Sanofi për miratimin e tolebrutinibit për trajtimin e të rriturve me sklerozë multiple sekondare progresive pa relapse (SPMS jorelapsuese). Arsyet e këtij vendimi nuk janë bërë publike në këtë moment.

Shumica e njerëzve me MS fillimisht zhvillojnë formën relapsuese-remitente (RRMS), e cila karakterizohet nga relapse apo sulme, ku simptomat përkeqësohen apo paraqiten papritur, por ndiqen nga periudha përmirësimi me lehtësim apo përmirësim të simptomave. Me kalimin e kohës, personat me RRMS mund të kalojnë në formën sekondare progresive (SPMS), e cila karakterizohet nga përkeqësim gradual i simptomave me kalimin e kohës. Disa persona me SPMS vazhdojnë të kenë relapse apo sulme dhe trajtimet e përdorura për RRMS mund të jenë efektive për ta. Megjithatë, për personat me SPMS pa relapse, opsionet e trajtimit janë jashtëzakonisht të kufizuara.

Tolebrutinibi është një terapi orale me administrim një herë në ditë, e cila synon të modifikojë aktivitetin e qelizave imune si qelizat B dhe mikroglia. Duke frenuar proteinën BTK në këto qeliza, terapia mendohet se redukton si inflamacionin akut që i nxit relapset dhe lezionet e reja, ashtu edhe proceset inflamatore kronike brenda trurit dhe palcës kurrizore që kontribuojnë në neurodegjenerimin progresiv dhe paaftësinë afatgjatë në MS.

Sanofi kishte kërkuar miratimin e terapisë posaçërisht për SPMS jorelapsuese dhe për ngadalësimin e akumulimit të paaftësisë, pavarësisht nga aktiviteti relapsues, te të rriturit me MS. Tolebrutinibi u miratua në Emiratet e Bashkuara Arabe për këto indikacione në korrik të 2025, duke shënuar miratimin e tij të parë në nivel global.

05/01/2026

TOP 10 LAJMET PËR SKLEROZË MULTIPLE NË 2025

Nr. 10 – Molekulat inflamatore pengojnë rritjen e qelizave që prodhojnë mielinë
Studiuesit raportuan se molekulat sinjalizuese inflamatore, të cilat zakonisht janë të rritura te skleroza multiple (MS), mund të ndërhyjnë në rritjen dhe maturimin e oligodendrociteve – qelizave përgjegjëse për prodhimin e mielinës në tru dhe palcën kurrizore. Mielina është një mbështjellës yndyror që i rrethon fijet nervore dhe ndihmon në transmetimin e sinjaleve elektrike, por ajo dëmtohet në MS. Këto gjetje ofrojnë njohuri të reja mbi mënyrën se si inflamacioni mund ta pengojë riparimin e mielinës në MS.

Nr. 9 – Bari në hulumtim e nxit riparimin e mielinës në modelet paraklinike
Një terapi eksperimentale e quajtur 2-D08 u gjet se nxit riparimin e mielinës dhe përmirëson funksionin motorik në modelet shtazore të MS-së. Aktualisht, nuk ka trajtim të miratuar që mund ta nxis riparimin e mielinës në MS dhe identifikimi i terapive që e rigjenerojnë mielinën konsiderohet si fushë revolucionare në hulumtimet e MS-së. Gjetjet sugjerojnë se 2-D08 mund të jetë një trajtim premtues për MS, megjithëse nevojiten studime të mëtejshme mbi sigurinë dhe efektivitetin e tij.

Nr. 8 – Nivelet e larta të hormonit tiroide FT4 lidhen me rrezikun për MS
Nivelet më të larta të hormonit tiroide FT4 lidhen me një rrezik të shtuar për zhvillimin e MS-së, sipas një analize të të dhënave gjenetike nga mijëra individë. Studime të mëparshme kanë sugjeruar se pacientët me MS kanë shkallë më të lartë të sëmundjeve tiroide, por nuk ka qenë e qartë nëse kjo ndodh sepse MS-ja shkakton çrregullime të tiroides apo nëse çrregullimet tiroide janë një faktor rreziku për MS. Studimi, i publikuar në mars, sugjeron se problemet tiroide mund të ndihmojnë në krijimin e terrenit për MS, më shumë se sa të jenë pasojë e saj.

Nr. 7 – Disa ushtrime për ekuilibrin janë më të përshtatshme për probleme të caktuara
Një studim i vogël zbuloi se disa ushtrime janë më efektive se të tjerat në lehtësimin e problemeve specifike të ekuilibrit te personat me MS. Për shembull, ushtrimet që synojnë sistemin vestibular, i cili percepton pozicionin e trupit në hapësirën tredimensionale, sollën përmirësime më të mëdha të ekuilibrit kur individi qëndronte në vend. Nga ana tjetër, ushtrimet për forcimin e muskujve që mbajnë posturën ishin më të përshtatshme për personat me vështirësi të ekuilibrit gjatë lëvizjes.

Nr. 6 – Vegla më të ndjeshme mund ta matin paaftësinë e hershme në MS
Studiuesit në Itali raportuan se vegla klinike alternative, si matja e lartësisë së kërcimit të një pacienti, mund të zbulojnë deficite funksionale të imëta te personat me MS më efektivisht sesa Shkalla e Statusit të Zgjeruar të Paaftësisë (EDSS), mjeti më i përdorur për ndjekjen e paaftësisë në MS. Edhe personat me rezultate minimale në shkallën EDSS mund të shfaqin dëmtime të lehta kur vlerësohen me këto mjete.

Nr. 5 – Shkallë të larta të dëmtimit kognitiv te pacientët me MS të patrajtuar
Një studim me 140 të rritur me MS që nuk kishin marrë kurrë trajtim tregoi se më shumë se një e katërta raportuan një shkallë të caktuar dëmtimi kognitiv, si vështirësi me kujtesën ose me përpunimin e detyrave komplekse. Analiza tregoi se dëmtimi kognitiv ishte veçanërisht i shpeshtë te personat me MS progresive sekondare (SPMS) dhe se ata me dëmtim kognitiv kishin nivele dukshëm më të larta paaftësie.

Nr. 4 – Mosha në momentin e diagnozës së MS ndikon në rezultatet afatgjata shëndetësore
Sipas një analize të gati 700 pacientëve në Kanada, personat që diagnostikohen me MS në moshë më të re kanë prirje të kenë shëndet fizik më të mirë afatgjatë, por shëndet mendor më të dobët, krahasuar me ata që diagnostikohen më vonë në jetë. Studiuesit gjetën se nivelet e paaftësisë shpjegonin rreth dy të tretat e këtyre ndryshimeve, duke sugjeruar se faktorë të tjerë, si aftësia për vetërregullim dhe mënyra se si sëmundja ndikon në pjesëmarrjen sociale, mund të luajnë gjithashtu një rol.

Nr. 3 – Llojet e yndyrave në ushqim ndikojnë në rezultatet e MS nga dieta ketogjenike
Përfshirja e acideve yndyrore të ngopura me zinxhir të gjatë, si ato që gjenden në gjalpë dhe mish të kuq të yndyrshëm, në një dietë ketogjenike (e ulët në karbohidrate dhe e pasur me yndyra) u zbulua se përkeqëson ashpërsinë e sëmundjes në një model të MS-së te minjtë. Disa kërkime kanë sugjeruar se ky lloj diete mund të ndihmojë në uljen e inflamacionit në MS, por këto gjetje tregojnë se lloji i yndyrës së përfshirë në dietën ketogjenike mund të ndikojë ndjeshëm në rezultatet e MS-së.

Nr. 2 – Vitamina D mund të ndihmojë në vonimin e aktivitetit të hershëm të sëmundjes në MS
Rezultatet nga një provë klinike e Fazës 3 treguan se dozat e larta të vitaminës D ulën ndjeshëm rrezikun e aktivitetit të mëtejshëm të sëmundjes te personat me sindromë të izoluar klinike dhe MS të hershme relapsuese-remitente (RRMS). Nivelet e ulëta të vitaminës D janë identifikuar si faktor rreziku për zhvillimin e MS-së, por mbetet e diskutueshme nëse suplementet e vitaminës D janë të dobishme për personat që tashmë e kanë sëmundjen. Gjetjet sugjerojnë se vitamina D mund të ndihmojë në vonimin e shfaqjes së aktivitetit të ri në MRI, megjithëse nuk u vunë re dallime domethënëse në relapse apo sulme.

Nr. 1 – Dieta ketogjenike mund të ulë aktivitetin e qelizave inflamatore në MS
Në një provë klinike të Fazës 2, personat me MS që ndoqën dietën e modifikuar Atkins – një version më pak restriktiv i dietës ketogjenike që nuk kërkon të njëjtin kufizim të karbohidrateve – shfaqën ndryshime në aktivitetin e qelizave imune në përputhje me uljen e inflamacionit. Të dhëna të mëparshme nga e njëjta provë kishin treguar gjithashtu se pacientët raportuan përmirësime të ndjeshme në funksionin fizik, cilësinë e jetës dhe reduktim të disa simptomave të MS-së pas 6 muajsh ndjekjeje të dietës.

#2025

31/12/2025

Është thjesht ndërrimi i datës. Mund ta quajmë apo të mos quajmë festë, varësisht se si e përkufizojmë festën.
Mund të mos festojmë, por thjesht rikapitulojmë dhe reflektojmë çfarë kemi bërë në vitin që shkoi pas; planifikojmë, i bëjmë premtime vetes, synojmë arritje të reja, udhëtime të reja, projekte të reja, kënaqësi e gëzime të reja.
Bëhemi bashkë me familjarët e miqtë, qeshim e bëjmë llaf si në asnjë ditë tjetër të vitit, marrim frymë gëzueshëm, lindin shpresat e reja, i japim vetes gajret se në vitin e ri do të gjejmë kohë për fitnes, për ta vizituar Parisin apo për ta ndërruar veturën!
Mbi të gjitha, SHËNDETI! Imagjinoni në një ditë të 2026-s të merrni një informatë për diçka që e cenon shëndetin tuaj! Të gjitha ato synime, plane, dëshira bien në ujë! Prandaj, qëndroni mendërisht dhe fizikisht aktiv, bëni kontrolle të rregullta, udhëtoni, trajtoni çdo çrregullim, sëmundje apo varësi që keni, përfshirë lënien e duhanit e alkoolit, harxhimin e kohës së kotë përpara celularit e debateve televizive politike!
Çdo ditë i të qenit shëndoshë, i aftësisë për të marrë frymë, i pavarësisë nga të tjerët është FESTË! Një mbledhi e një gëzim, e një urim, nuk na bën asgjë pos të qenit më pozitiv!

30/12/2025

DY LLOJE TË REJA BIOLOGJIKE TË SKLEROZËS MULTIPLE?

Shkencëtarët kanë zbuluar dy nënlloje të reja të sklerozës multiple (MS – bazuar në veçoritë biologjike) me ndihmën e inteligjencës artificiale (AI), duke hapur rrugën për trajtime të personalizuara dhe rezultate më të mira për pacientët. Bëhet fjalë për dy profile të reja biologjike të MS-së, që bazohen në në një test të thjeshtë të gjakut dhe skanime me rezonancë magnetike (MRI).

Në një studim që përfshiu 600 pacientë, i udhëhequr nga University College London (UCL) dhe Queen Square Analytics, studiuesit analizuan nivelet në gjak të një proteine të veçantë të quajtur neurofilament i zinxhirit të lehtë në serum (sNfL). Kjo proteinë mund të ndihmojë në tregimin e nivelit të dëmtimit të qelizave nervore dhe ta sinjalizojë aktivitetin e sëmundjes.

Rezultatet e sNfL-së dhe skanimet e trurit të pacientëve u interpretuan nga një model i mësimit makinerik, i quajtur SuStaIn. Rezultatet, të publikuara në revistën mjekësore Brain, zbuluan dy tipe të dallueshme të MS-së të cilat u quajtën përkatësisht sNfL i hershëm dhe sNfL i vonshëm.

Në nënllojin e parë, pacientët kishin nivele të larta të sNfL-së që në fazat e hershme të sëmundjes, me dëmtime të dukshme në një pjesë të trurit të quajtur “corpus callosum”. Ata gjithashtu zhvillonin shpejt lezione në tru. Ky tip dukej të jetë më agresiv dhe më aktiv.

Në nënllojin e dytë, pacientët shfaqnin atrofi apo tkurrje të trurit në zona si korteksi limbik dhe substanca gri e thellë, përpara se në serum të rritej niveli i sNfL-së. Ky tip dukej të jetë më i ngadalshëm, me dëmtime të dukshme që shfaqeshin më vonë.

Studiuesit thonë se ky zbulim do t’u mundësojë mjekëve të kuptojnë më saktë se cilët pacientë janë në rrezik më të lartë për komplikime të ndryshme, duke hapur rrugën për kujdes dhe trajtim më të personalizuar.

Sipas autorit kryesor të studimit, Dr. Arman Eshaghi nga UCL: “Skleroza multiple nuk është një sëmundje e vetme dhe klasifikimi aktual i nënllojeve nuk i përshkruan ndryshimet themelore të indeve, të cilat duhet t’i njohim për ta trajtuar sëmundjen. Duke përdorur një model të AI-së të kombinuar me një biomarker të disponueshëm gjerësisht në gjak dhe me MRI, kemi arritur të tregojmë për herë të parë dy modele të qarta biologjike të sklerozës multiple. Kjo do t’i ndihmojë klinicistët të kuptojnë se ku ndodhet një person në rrjedhën e sëmundjes dhe kush mund të ketë nevojë për monitorim më të afërt ose për trajtim të hershëm dhe të synuar.”

Ky hulumtim u shtohet dëshmive në rritje që mbështesin largimin nga përshkrimet ekzistuese të llojeve dhe ecurisë së sklerozës multiple që bazohet kryesisht në aktivitetin klinik dhe kalimin drejt termave që pasqyrojnë biologjinë themelore të sëmundjes. Kjo mund të ndihmojë në identifikimin e personave me rrezik të shtuar për progresion – dhe t’u mundësojë atyre trajtime më të personalizuara.

https://academic.oup.com/brain/article/148/12/4578/8321558

28/12/2025

Sipas hulumtimit të publikuar në Neurology Journal, aktiviteti spindle në lobin temporal gjatë gjumit është i reduktuar në fazat e hershme të sëmundjes së Alzheimerit dhe është i ndërlidhur me temp më të shpejtë të rënies kognitive.
https://hubs.ly/Q03YVhYr0

According to this study, temporal lobe sleep spindle activity is reduced in early clinical stages of Alzheimer disease and is associated with a faster rate of cognitive decline: https://hubs.ly/Q03YVhYr0

25/12/2025

Tetanusi është infeksion i rëndë neurologjik që mbetet një prej arsyeve tragjike të sëmundshmërisë dhe vdekshmërisë në mbarë botën, përkundër qasjes në vaksina, antitoksinë dhe kujdes intensiv.

📊 Figura: Veçoritë klinike dhe komplikimet e tetanusit të gjeneralizuar.

Tetanus is a devastating neurological infection that remains a major cause of global morbidity and mortality, despite access to vaccines, antitoxin and intensive care.

A Review provides a summary of the causes of tetanus, its clinical features, and management options. Find out more via link in comments 💬

📊 Figure: Clinical features and complications of generalised tetanus.

23/12/2025

Toferseni ka kontribuar në ngadalësimin e rënies funksionale dhe në pakësimin e rrezikut për vdekje të pacientëve me sëmundjen e motoneuronit ( ), të shkaktuar nga defekti gjenetik SOD1, sidomos me trajtimin e hershëm, përgjatë 148 javëve të trajtimit.

https://ja.ma/4pifoXm

Editorial: Tofersen slowed functional decline and reduced risk of death for patients with SOD1-related , especially with early treatment, and showed durable biomarker improvements over 148 weeks.

https://ja.ma/4pifoXm

18/12/2025

Shqyrtimi i literaturës tregon që kanabidioli mund ta pakësojë numrin dhe kohëzgjatjen sulmeve epileptike, si në aspektin klinik, si në atë elektrofiziologjik përmes incizimit me EEG. Ky studim i përmbledh dëshmitë aktuale mbi efikasitetin e kanabidiolit në trajtimin e epilepsisë rezistente ndaj barnave dhe analizon mekanizmin e veprimit të tij në epilepsitë rezistente dhe manifestimet e tyre në EEG.
Më shumë detaje në linkun e Epileptic Disorders në doi.org/10.1002/epd2.70085.

"Research indicates that CBD may decrease both the number and duration of seizures, observed clinically and in EEG manifestations. This narrative review summarizes current evidence on the efficacy of CBD in treating drug-resistant epilepsy and analyzes its mechanisms of action in various forms of treatment-resistant seizures and their EEG presentations."

Read this review article from Epileptic Disorders at doi.org/10.1002/epd2.70085.